Vawiin chhun dar 11:00 khan FOCUS hnuaia Livestock Value Chain chungchanga Serchhip District a hmalakna tur sawi hona hun District Agriculture Office ah neih a ni.

He meeting hi Pu C.Lalnithanga, District Agriculture Officer leh District Project Manager, FOCUS chuan a kaihruaia a. FOCUS hnuaia Livestock Value Chain chungchanga Serchhip District chhunga an hmalakna turah Department zawng zawngte thawhhona tha an neih a tul thu leh a bik takin AH & Vety Department te an pawimawh em em a ni, a ti a, theih tawp chhuah turin a sawm a ni.

Dr. Lalhmingthanga, Deputy Director, SCRAM & FOCUS Implementation Management chuan thusawiin, an hnathawh tur hi a enkawltu depertment aiin DVO te an tan a ngai hle dawn a ni, a ti a. Thingtlanga ranvultuten awlsam zawka an harsatna an sutkian theih nan FOCUS hian nasa takin hma an lak tur thu a sawi a. A hlawhtlinna erawh chu Vety Departmenta kan officer te  kutah a innghat nasa hle a ni, a ti a, DVO staff leh VFA te chu a tulna apiangah Agriculture Department pui thin turin a sawm a ni.

He hunah hian Dr. Zarzoliana, District Veterinary Officer, Serchhip leh Technical Officer (Vety) FOCUS, Serchhip leh Assistant Manager te an tel a. Serchhip District chhung khaw hrang hranga kuthnathawktu, loneitute leh ran vulhtute mamawh hrang hrangte leh enkawl pui dan tur (Livestock value Chain) a hmalakna tur ruahmanna an siam a ni.