No.4211/2021-2022

Aizawl, the 9th March, 2022: Vawiin chawhnu dar 3 khan Champhai District Bawrhsap Pu Henry C.Lalrawnkima hovin World Consumer Rights Day 2022, March ni 15 a hman dan tur relin DC Conference Hall-ah thutkhawm a ni.

Pu Henry C.Lalrawnkima chuan Mizo ten thil kan lei leh dawr changin kan dikna leh chanvo te kan hriat tawk loh thin thu sawiin, dan ang taka thil kalpui a nih theih nan dikna leh chanvo te inhrilhhriatna leh inzirtirna neih a tul hle a ni, a ti a. Kan zavaiin mamawh nei leh thil leitu theuh kan nih avangin kan dikna vawnhim kawngah kan thawhho that a ngai a ni, a ti bawk. Champhai District Consumer Association hotute chu an thiltih leh hmalaknate District Administration-te hrilhhre zel thin turin a ngen bawk.

Kumin World Consumer Rights Day 2022 thupui atan 'Fair Digital Finance' tih chu hman tur a ni a. Hemi pual hian March ni 15 a program siam dan turte sawiho a ni a, chawhma dar 10 ah DC Conference Hall-ah hun hman nise, Consumer Rights chungchang a zau thei ang berin media hrang hrang leh tlangau hmanga puanzar nise tih a ni a. Consumer Protection Act chungchang inziahna lehkhabu sem chhuah tum a ni bawk a. Hemi ni hian thupui leh a kaihhnawihte sawifiah turin resource person pahnih rawih tha tih a ni a, mipui nawlpui thlengpha tur inzirtir kawnga hmalak dan turte leh tul dangte sawiho a ni bawk.

Consumer ten an lungawilohnate an thlena ngaihtuah sak an nih theih nan District-ah Consumer Dispute Redressal Commission din a ni a, Champhai District-ah chuan President atan Additional District & Sessions Judge chu ruat a lo ni tawh a ni.

Vawiin meeting-ah hian DC Office a Officer-te, DCSO, DIPRO leh Champhai District Consumer Association hotute an tel a ni.