2676/2022-2023
Champhai, the 15th November, 2022: Central Young Mizo Association (CYMA) leh Mizoram State AIDS Control Society (MSACS) te bultuma HIV/AIDS hluar zel tur dona kawnga hmalakna, 'Zoram Harh Rawh Campaign' kaltlanga Branch YMA te tana Mizo hnam lam leh hnam zai hmanga intihsiakna neih tur buaipuitu, Champhai District Level Organising Committee on Zoram Harh Rawh chu vawiin chhun dar 12 khan an Chairman Pu James Lalrinchhana, District Bawrhsap hovin DC Conference Hall-ah an thukhawm.

He hunah hian hmalak tawh dante ngaihthlak niin, Sub-Hqrs YMA leh Sub-Commitee dangte atangin report ngaihthlak a ni a. Thukhawm chuan Zoram Harh Rawh Campaign kaltlanga hnam lam leh zai intihsiakna chu nikhat chhunga zawh hman ni se a ti a, November ni 18, 2022 Zirtawpni chawhma dar 11 ah Kahrawt Community Hall leh Field-ahte neih tum a ni a, hemi atana program duante chu pawm a ni a. He ni bika program-te hi Local Cable TV pahnih CCN leh LCN ahte Live Telecast kaltlanga pekchhuah tum a ni.

Mizo hnam lam intihsiakna turin Cheraw (Kantluang) leh Khuallam te thlan a ni a, heng bakah hian Darmani Zai, Lianrikhumi Zai, Awithangpa Tlawh Zai, Labour V Force Zai leh Domangi Zai te zinga duh ber pakhat thlanga zai tur a ni dawn bawk a. Hla hi chang thum thleng sak tur niin, hemi zai thluk hmanga hla awmsa emaw, thupui HIV/AIDS dona lam hawia hla phuah chawp leh cheimawite hman phal a ni. He huna telte tan hian HIV/AIDS Awareness Campaign neih a ni dawn bawk a. Zoram Harh Rawh Campaign intihsiaknaa tel tura inhriattir YMA Branch 6, Zotlang, Venglai, Kahrawt, Vengthlang, Vengthar leh Kanan Branch YMA te an awm a ni.

District Level-a tithate tan State level intihsiakna December ni 1, 2022 hian neih tura ruahman a ni a. District bikah hian pakhatnain Rs. 50,000/-, pahnihnain Rs. 30,000/- leh pathumnain Rs.10,000/- te an dawng dawn a. Heng bakah hian Champhai District-a tel dang 3 te chu Consolation Prize Rs. 5,000/- theuh pek tum a ni bawk.

Zoram Harh Rawh Campaign-in a tum ber chu mipuite HIV/AIDS chungchang ngun taka zirtir a ni a. HIV laka inven dan leh inven nachang an lo hriata kan rama HIV a darh zel loh nana ruahman a ni a. Heng bakah hian a vei mekte'n enkawlna tha dawn a pawimawhzia an hriata, inenkawlna dawng tura inenkawlna hmun pan nachang an hriat theih nan te, HIV kai thei dinhmuna dingte'n an dinhmun dik tak an hriat theih nana thisen test-na hmun kawhhmuh leh mahni dinhmun inhriatchian pawimawhna leh thatnate zirtir a ni.