2677/2022-2023
Champhai, the 15th November, 2022: British awpbehna ata India ramin zalenna a hmuh champha vawi 75-na, Azadi Ka Amrit Mahotsav (AKAM) lawmna kalpui mek zelah vawiin chawhnu dar 2 khan Tribal hnam zing atanga zalenna hmuh theih nana thawhhlawk tak tak leh nunna hlu tak hlantute zahna lantirna leh hriatrengna, Janjatiya Gaurav Diwas pualin Awmpuiphei, Bazar panna atanga Vengthlang Presbyterian Biak In kawt thleng kawngzawh a ni.

He ni puala programme tawi hman hi Pu Moses Lalfakawma Tlau, SDC leh Dr. Vanlalnunpuii Ralte, SDC te'n kaihruaiin Janjatiya Gaurav Diwas hman anih chhante an sawifiah bakah, zalenna neih anih theih nana Mizo zinga thawhhlawkte chanchin an tarlang bawk a. Sub-Hqrs YMA Cultural Troupe te'n hnam lam mawi tak tak an entir bakah hnam hlate ngaihthlak a ni a. Pu H. Lalhruaitluanga, SDO Sadar-in lawmthu sawiin hun a khar a ni.

Sawrkar laipui chuan nikum atang khan November ni 15 hi tribal-te zinga India ram zalenna sualtu mi huaisente hriatrengna leh chawimawina ni, Janjatiya Gaurav Diwas atan a puang a. November ni 15 hi zalenna sualtu hruaitu huaisen leh langsar tak, tribal leader Birsa Munda piancham denchhena Janjatiya Gaurav Diwas atana puan a ni.