2678/2022-2023
Lunglei the 15th November' 2022: Vawiin khan Pi Carolyn L.B. Khiangte, District Civil Supply Officer, Lunglei kaihhruaiin a office chamber ah Lunglei leh Hnahthial District ah te LPG Home delivery kalpui dan tur rel a ni. He hunah hian a kaihhnawih official, Lunglei District Consumer Union, Southern Gas Agency, EL PEE Gas Agency, Zomawi Gas Agency leh Fidelia Gas Agency (Hnahthial) te an tel a ni.

Pi Carolyn L.B. Khiangte chuan Mizoram sorkar thuchhuak angin LPG Home delivery hi Aizawl Municipal Area leh District zawng zawng ah 1st December 2022 atanga kalpui tur tih a nih avangin Lunglei leh Hnahthial District ah pawh kalpui tura inbuatsaih a ngaih thu a sawi. Home delivery tihna man lak tur rate hi Rs 70/- aia to lo turin sorkar in a tuk thu tarlan ani bawk.

Gas Agency ten an hmalak tawh dan leh inbuatsaih mek dan te sawiho niin vawi leh khat ah consumer zawng zawng tuam chhuah a harsat thu an sawi a. Agency tin ten veng pakhat thlan bikah kalpui phawt nise, hemi kalpui tur hian November 2022 chhung hian Consumer te KYC update te, thawktu lak belh te, delivery motor neih belh te, Cylinder bukna leh Cylinder check na (Leak detector) ruahman te a ngaih thu sawiin Home delivery man Rs 70/- chu veng hlat dan a zirin Consumer Union, VC, NGO leh Supply Department te nen meeting na ah rel that leh nise. Online booking pawh a tam thei ang bera zirtirna pek nise tih an sawi bawk.

LPG Home delivery bultan nan Gas Agency tin te hian veng pakhat theuh thlangin, Southern Gas Agency in Salem Veng, EL PEE Gas Agency in College Veng, Zomawi Gas Agency in Chanmari leh Fidelia Gas Agency (Hnahthial) in Hnahthial Electric Veng te an ni.

LPG rate thar ber 1st October 2022 atanga hman chu Domestic Cylinder 14.2kg chu Rs 1205, delivery charge Rs 70/-, Godown a lakin a man atanga Rs 29.26/ paih tur, Street Point a lakin a man bakah Rs 7.53/-pek belh tur a ni. Southern Gas Agency in Consumer 25000, EL PEE Gas Agency in Consumer 8000, Zomawi Gas Agency in Consumer 16000 leh Fidelia Gas Agency in Consumer 5000 an nei mek a ni.