Vawiin hi Chapchar Kut ni a ni a; Aizawl-ah chuan Lammual-ah zing dar 11.30 atang khan nil eng awhin ropui taka lawm a ni a; Pu P.C. Zoramsangliana, Art&Culture Minister chu Kut Thlengtu a ni. Chief Minister Pu Lal Thanhawla chu Kut Pa a ni a; Mizoram Larsap Pu Vakkom Purushothaman chu khuallian niin, Pu Som Kamei, NEZCC Director chu khual-zahawm a ni.

Chapchar Kut lawmnaa Khuallian Pu Vakkom Purushothaman pawhin thuchah sawiin, “Vawiina Chapchar Kut kan hman dan ka en hian Kerala chauh ni lovin Mizoram pawh hi khualzinte hip tura Khuanu Duan Sa (God’s Own Country) a ni tih ka hmu chiang lehzual a. Ram hmelhmang mawi danglam tak mai, sik leh sa nuam em em leh remna boruak muanawm tak kan neih hi khawvelah nasa zawkin tlangaupui ila, khawvel kil tin atanga khualzinte hip lutin, kan sum lakluh a lo pung ang a, thalai lehkhathiamte tan hna tau a tet ang a, kan economy hi a lo thang sawt dawn a ni” a ti. Larsap chuan a pian leh murna Kerala leh Mizoram chu India rama ziak leh chhiar thiam tam berna a nih avanga chhuanawm a tih thu sawiin, “He kan dinhmun hi kan chhuangin, kan chapopui ngam tur a ni. Chuvang chuan Kerala thalaite ang bawkin Mizo thalai lehkhathiamte pawh hi India ram leh khawvel hmun danga eizawng turin kan feh chhuak ngam tur a ni. Khawi state sawrkar mah hian an thalai lehkhathiam zawng zawngte tan hna leh eizawnna a siam seng ngai dawn lova, chuvangin keimahni lam hi ram tin dap chhuak tura kan inbuatsaih a pawimawh a ni” tiin thalaite a fuih a ni. Mizoram sawrkarin ram pawn lam atanga industry din duhte tana kawng a hawng chu thil lawmawm a nih thu sawiin, “State pawn atanga thilsiamna lian tham rawn din duhte sawm luh hi a tha a, ram leilungfate tan eizawnna tam tak a siam thei a; sawrkar tan pawh chhiah atangin sum tam tak a lakluh theih bawk a ni. Kerala state-ah phei chuan industry liante hip nan a thlawnin ram kan pe a, chhiahte hial pawh kan awl thin a ni” Larsap chuan a ti bawk.

Kut Pa Pu Lal Thanhawla chuan Mizoram leh khawvel hmun hrang hranga Zofate chu Chapchar Kut chibai bukin, duhsakna a hlan a. “ Chapchar Kut hi kan pipute hun ata inremna kutpui a nih angin, vawiinah hian thinlunga mi dangte nena inrem chungin i hmang ila; Chapchar Kut hian Mizo hnahthlak zawng zawngten inunauna te, inremna te, inpumkhatna te kan mamawhzia min hriat thar tir se ka duh tak meuh a. Khawi hmun leh khawi ramah pawh Zo hnahthlakte hi awm mah ila Mizo nihnaah hian kan lungawi mai tur a ni. Chi bing leh hnam bil anga inlak hran duhna hian kan inkarah innghirnghona leh buaina bak a thlen lova; remna leh muanna duhin kan In-pui Mizoram lam hi kan hawi leh nge nge thin si a ni” a ti. Pu Lal Thanhawla chuan Mizote Kut zinga hlimawm ber leh tun hun thlenga kan chhawm nun Chapchar Kut chu khualzin hip luhna atan leh sum lakluhna hnar a nih theihna tura sum tam tak senga sawrkarin a buatsaih thin thu a sawi a. Chapchar Kut hmang tura thalai lo pungkhawmte chu fuihin, “Thalaite khawvel thar siam hna Mizoram sawrkarin theih tawpa a kalpui mek lai hian Mizo thalaiten kan nun kan uluk lehzual a pawimawh a; aia upate zah thiam kawngah te, tlawmngaihna kawngah te, inpumkhatna kawngah te Pathian hrereng chungin tan i la thar ang u” tiin a chah a ni.

Vawiin a Lammual-a Chapchar Kut hmannaah hian Kut Thlengtu Art & Culture Minister Pu P.C. Zoramsangliana pawhin mipuite chibai bukin, Chapchar Kut chu hlim tlang tak leh Lal Isua telna tlaka hmang turin Kut chhimtute a chah a ni. Pu Lalbiakzuala, CYMA Vice-President pawhin duhsakna thuchah a sawi bawk. Chapchar Kut-ah hian Mizo hnam lam chi hrang hrangte entir a nih bakah, zai leh rimawi chi hrang hrangte ngaihtlak a ni a. Assam, Manipur, Menghalaya leh Nagaland atanga Chapchar Kut hmang tura lokalten hun an hmang bawk a ni