Vawiin khan Art & Culture Minister Pu R.Romawia hovin Chapchar Kut 2016 Organising Committee chu a pisaah an thu khawm.

He hunah hian mawhphurhna latu Sub-committee hrang hrang report ngaihthlak a ni a. Chanvo leh mawhphurhna hrang hrang nei turte chu an inpeih kim thawkhat tawh a. Kut hlung tak hman a nih theih nan mahni hma zawn theuhvah theihtawp an chhuah hlawm a ni.

Programme Committee-in Kut nia hun hman dan tur an lo duan lawk chu thlir ho a ni a. Zau taka sawi hovin, tlem tihdanglam a nih hnuah pawm a ni.

Kumin Chapchar Kut hi March ni 4 hian Aizawl Sipai Lammualah hman leh tura ruahman a ni a. Mizoram Chief Minister Pu Lal Thanhawla chu Kut Pa tur niin, Art & Culture Minister Pu R.Romawia chu Kut Thlengtu a ni ang. Mipui huap zo thei ang bera hman a nih theih nan item hrang hrang thlan chhuah a ni a. Mizo hnam lam, zai leh rimawi chi hrang hrang te, Mizo hnam zia pho lang thei tur thil hmuhnawm leh ngaihnawm tak tak hmuh leh ngaihthlak tur a awm dawn a. Assam, Meghalaya, Tripura leh Manipur-a Mizo hnahthlak awmte pawh he Kut hmang tur hian an lo kal dawn an ni.