4779/2025-2026

Dated Aizawl, the 11th March, 2026: Vawiin khan Pi Betsy Zothanpari Sailo, Secretary, Information & Public Relations, Printing & Stationery (IPRP&S) Department chuan Vanapa Hall-ah Directorate of Information & Public Relations (I&PR), Mizoram Art Development Society (MADS) leh Mizo Photographers’ Society (MPS)-te buatsaih, ni thum awh tur Chapchar Kut 2026 puala lemziak leh thlalak phochhuah runpui, Art & Photo Exhibition chu khuallian niin a hawng.

Khuallian Pi Betsy Zothanpari Sailo chuan lemziak mite leh thlalatute hmalakna chu chhuanawm a tih thu sawiin, an thawhrimna a fak a. Lem ziah leh thla lak chu mi nazawng tih chi a ni lova, talent neih that a ngai a, an ngaihtuahna leh rilru put hmangte an themthiamna hmanga an phochhuak thiam chu entu mipuite pawhin ngun taka an thlir a, an ngaihhlutsak zual zel a, anni pawhin hlawhtlinna sang zawk an chan zel a beisei thu a sawi a ni.

Hawnna hunah hian Pi Carol VLMS Dawngkimi, Director, Art & Culture Department leh I&PR officer leh staff-te bakah MADS leh MPS member-te an tel a. Pi K. Vanlalsangi, Director, I&PR-in kaihruaiin, inlawmna thu a sawi a. Chapchar Kut puala Painting Exhibition chu kum 2012 atanga neih tan a ni a, Photography Exhibition pawh kum 2016 atanga neih chhoh a ni tih sawiin, MADS leh MPS-te inpekna chu lawmawm a tih thu a sawi a. MADS President Pu Vanlalhriata leh MPS President Pu Zoramchhana-te’n an pawl hmalaknate an tarlang a. Pu Pratap Chhetri, Deputy Director, I&PR-in lawmthu sawiin hun a khar a ni.

Chapchar Kut 2026 Art & Photo Exhibition hian vawiin, March ni 11, 2026 atanga March ni 13, 2026 thleng a awh dawn a. Tlawhtute’n lemziak leh thlalak phochhuahte hi an lei thei dawn a. MADS chuan hemi pual hian ‘Zozia’ tih thupui hmangin Art Camp an lo buatsaih tawh a, member 68-te an tel a. Exhibition-ah hian a vaiin lemziak leh thilsiam 107 phochhuah a ni a, chu’ng zingah chuan Pencil/Charcoal hmanga ziah 5; Mixed Media 3; Sculpture 3; Watercolour hmanga ziah 13; Acrylic hmanga ziah 80 leh Oil Painting 3 a tel a ni. MPS-te’n mi 39-te thlalak thehluh atanga thlanchhuah thlalak 126 an phochhuak bawk a ni.