4522/2024-2025

Aizawl, March ni 4, 2025: Vawiin chawhma khan Vanapa Hall ah kumin Chapchar Kut puala Art & Photo Exhibition buatsaih chu I&PR Secretary Pi Betsy Zothanpari Sailo chuan mipui tlawh turin a hawng. Exhibition ah hian Mizoram Art Development Society (MADS) atangin member 67 te’n an kutchhuak tarchhuakin, Mizo Photograpers’ Society (MPS) member te kutchhuak 120 chuang phochhuah a ni bawk.

Exhibition hi Chapchar Kut Ni thlenga neih tur a ni a. Tlawhtuten Exhibition a phochhuah thlalak leh lemziak te hi a hmunah an lei thei nghal dawn bawk a ni.

Vawiin programme-ah hian Chapchar Kut puala Organizing Committee-in a buatsaih Photo Competition leh Reels making competition a lawmman dawngtute puanna leh lawmman hlanna hun neih a ni bawk.

Khuallian I&PR Secretary Pi Betsy Zothanpari Sailo chuan thu sawiin Chapchar Kut puala lemziak mite leh thlalatute tan an kutchhuak tha tak tak pholanna hun siam a ni thin chu lawmawm a ti a. Artist leh Photographer te tan leh hetiang lama tui mite tan hlawkna leh hmasawnna kawng a hawn a beisei thu a sawi a. Mipui zingah art ngaihhlutna a awm belh chho zel nia a hriat thu sawiin, tun tum exhibition-ah pawh hnam ziarang entir thei lam phochhuahna hun remchang siam a ni chu thil lawmawm tak a ni, a ti a. Heng kutchhuakte hi Mizoram chhung mai bakah state pawn lam thlenga mi tam zawkin an hriat phah a duhsak thu a sawi bawk.

Vawiin Art & Photo Exhibition hawnna inkhawm hi I&PR Director Pu C. Lalnunkima chuan kaihruaiin, MADS leh MPShruaituten thu an sawi bawk a. Art & Culture Deputy Director Pu Lalthanmawia chuan Photo Competition leh Reels making competition chungchang sawizauin lawmman dawngtute a puang a. Inkhawm hi Pi Emily Lalrinpuii, I&PR Deputy Director-in lawmthu sawiin hun a khar a ni. 

PHOTOGRAPHY COMPETITION (OPEN) WINNERS:

Category I (Mimal):

1) Zongchinthanga

2) Richard Zothankima

3) Richard Zothankima

Consolation: C. Zoremsanga, Ramnunmawia, S. Lalchhuanawma

Category II (Group):

1) Paul Lalhruaitluanga

2) Zongchinthanga

3) Muana Khawlhring

Consolation: Richard Zothankima, R. Lalnunchhana, F. Vanlalpeka

Category III (Naupang Pual):

1) Marama Cherput

2) Lallawma Jongte

3) David Lalchhanchhuaha

Consolation: C. Lalchawiliana, C. Lalrothanga, K. Vanlalmuana 

REELS MAKING COMPETITION (for High Schools & Higher Secondary Schools) WINNERS:

1) Bethel Mission School, Champhai

2) St. John’s Higher Secondary School, Kolasib

3) Govt. Higher Secondary School, Serchhip, Serchhip

Consolation:

a) Govt. Republic HSS, Ramthar Veng

b) St. John’s HSS, Kolasib

c) Ngurnunsangi High School, Lawngtlai 

Photography Competition ah hian category tinah lawmman pakhatna in Rs. 7000, memento leh certificate, lawmman pahnihna in Rs. 5000, memento leh certificate, lawmman pathumna in Rs. 3000, memento leh certificate a keng tel theuh a. Consolation prize hian Rs. 2000 leh certificate a keng tel bawk a ni. Reels Making Competition, zirlai te puala buatsaih hian lawmman pakhatna in Rs. 10,000, memento leh certificate, lawmman pahnihna in Rs. 7000, memento leh certificate, lawmman pathumna in Rs. 5000, memento leh certificate a keng tel a. Consolation prize hian Rs. 2000 leh certificate a keng tel bawk.