Mizoram hmun dang rualin vawiin khan Sub Hqtrs YMA Champhai huaihawtin Champhai Kahrawt YMA Field-ah Chapchar kut hman a ni a, Pu H Lalengmawia IAS Champhai Bawrhsap chuan Kutpa niin a hman pui a. Champhai chu Zokhawpui diktak ala nih vangte leh Mizo pipute sulhnu tam tak awmna a nih avangin Mizote rilru luahtu ber a ni a, Mizote tan chuan kan Jerusalem a nih vangin tuman kan hmusit thiang lo a ni, tiin Kut Pa chuan a sawi a ni.

DC Pu H. Lalengmawia chuan khawvel changkang zel ah kan pipute nunze mawi leh hnam zia rang kal san a ni thin a, tlawmngaihna, Dikna leh rinawmna te hian Mizote thinlung a chhuahsan loh na turin kan vawn nun reng theihnan kan inzir tir a ngai a ni a ti a. Mahni hnam leh culture ngaisang lo chuan ral mek a, Mi thenkhat te'n Mizo hnam hi a ral mai hlauthawng mahse Pathian zawn chhuah hnam kan nih avangin Mizo hnam hi a boral lo ang ati a, Mizo hnam hi a tha zawngin thang zel se la, ei leh bar leh sum leh paia hin todelhin Pathian duhdan takin Mizo hnam chu thang zel se a duh thu a sawi a ni.

Vawiin Champhaia Chapchar Kut lawmna hunah hian Pu VL Chama Hnamte Sub Hqtrs YMA President chu thlengtu a ni a. Thusawiin Pu VL Chama Hnamte chuan Mizo thalaite hian thalaite puala kut kan neih Chapchar kut hi Sorkarin a ruahman vang chauh ni loin, uar takin leh hlut thiam taka hman zel kan zir a pawimawh a ni a ti.

Chapchar kut hmanna ah hian YMA Branch hrang hrang 14 atangin hnam lam Cheraw, Khuallam leh Chawnglaizawn en tir a ni a. MUP Champhai Hqtrs leh Sub Hqtrs YMA bakah Branch YMA atang ten Zaipawl leh malzai ngaihthlak a ni bawk.