Vawiin chawhma dar 11:00 khan LAD Office kawt Lunglei ah Chapchar Kut hlawhtling tak a hman a ni a, Kut Pa ah Pu Sanghlira Colbert niin, Kut thlengtu Lunglei Bawrhsap Ashish Madhaorao More a ni.

Kut lawmna inkhawm Pu Rothuama, Addl. DC leh Organising Committee, Chairman ni bawk kaihhruaiah Kut Pa Pu Sanghlira Colbert chuan thu sawiin, khawvel hmasawnna kal zelah Mizo te pawhin hma kan sawn ve zela hetihlai hian kan hnam nunphung pholanna pawimawh tak kan Kut ngaihsanna chang pawh kan hre thar ve zel hi a lawmawm hle a ni a ti. India ramah hnam hrang hrang kan awm a kan hnam ziarang leh tihdan phung te kan in ngaihsan tawn sak a kan in zah tawn sak a pawimawh a, Pathian rawngbawlna kawngah pawh hnam nunphung leh ziarang in hriat sak hian tangkaina nasa tak a nei a ni a ti bawk. Mizote nunphung leh kan culture te, kan hnam thawmhnaw te hi khawvela hnam dangte pawh hian nalh an ti a, chuvangin kan hnam nunphung leh ziarang hi chawinung zelin Kut hi uar tak leh hlim takin i hmang ang u a ti a ni.

Kut thlengtu Pu Ashish More pawhin hun chep tak karah Organising Committee in ruahmanna fel tak siama Chapchar Kut hlimawm tak hman theih a ni chu lawmawm a tih thu a sawi a, a hmunhma duhthu sam a nilo deuh chu pawi a tih thu leh nakum lamah chuan hmunhma nuam zawkah hman theih ngei a nih a beisei thu a sawi. Pu Ashish More chuan Lungleia Chapchar Kut hmanna atan Mizoram sawrkarin sum a pek avangin lawmthu a sawi bawk a, Mizo te Kut pawimawh tak Chapchar Kut chu hlim leh nuam taka hmang turin mipuite duhsakna a hlan bawk.

Vawiin Chapchar Kut hmanna ah hian Mizo hnam lam chi hrang hrang entir a ni a, zaithiam ten kalkhawmte zai in an awi bawk a ni.