Vawiin ah khan Saitual Playground ah Mizoram hmundang te ang bawkin Saitual Town huam chhunga khaw hrang hrang te chuan Mizote tana Kut lianber Chapchar Kut chu hmunkhat ah an hmang hova. He hunah hian Home Minister Pu R.Lalzirliana chu Kutpa niin Pu K. Lalthawmmawia, Director, School Education chu Kut Thlengtu ah a tang thung a ni.

Kut pa Pu R.Lalzirliana, Home Minister hian Mizo nih nawmzia leh Mizo hnam tana Chapchar Kut hlut zia tarlangin he Kut chhimtute zawng zawng chu zonunmawi chawi nung zel tur leh kan hnamzia hlutna hre thar leh theuh turin a chah a. Kan hnam thil leh zia rang te chu hun rawn inher danglam zel leh Kristian-na nena her rem a tul thu sawiin mahni hnam ze bil bo thak khawpa changkan erawh chu thil hlauhawm tak nia a rin thu a sawi a ni. Hnam changkang zawk te hlei hlei hi an pi leh pu te ro leh hnamzia hluttute an ni a ti a. Heng hnam changkang zawk te pawh hian kan bula rawn kal a kan Kut te chhim ve an chakna chhan ber chu kan hnam ze dik tak kha a nih ang anga hmuh ve mai kha an chak vang a ni a. Changkanna hmanga kan hnamzia kan khuhbo hlauh a nih chuan hnamdang leh ram danga atanga min rawn kawm tum tu te kan hnar hlauh thei a ni a ti.

Chapchar Kut leh Mizote eizawnna ber, loneih hi a in zawm tlat avangin Kut lawmtute zawng zawngin ei leh bar ah intodelh nan engtin nge hmasawnna kan neih theih ang tih inzawh thar leh pawh hi thil tih awm tak a ni a ti a. Kan ram ro hlu ber ramngaw kan sawngbawl danah kan harh thar a ngai a ni a ti.Kan pi leh pute khan ei hmuhna ram an lo zah thiamzia leh ngaihtuahna thui tak nei chunga hun tiam neia bawh loh tur ram zuah nachang an lo hre thin kha an ngaihsanawm a ni tiin ramngaw leh nungcha humhalhna ah piangthar turin Kut lawmtu zawng zawng te chu a sawm bawk a ni.

Saitual Chapchar Kut, 2015 Lawmna hi Pu Donny Lalruatsanga, SDO(Civil) in a kaihruai a. Kut hawn nan hian MUP te'n 'Hlado' chham in meithal an lawn bakah darkhuang vua in Darbu an tum bawk a ni. Mimal zai, Chawnglaizawn, Sarlamkai, Solakia, Pangpar lam, ahuhova bu tamtakin Cheraw an kan te leh Miss Chapchar Kut thlanna hun hmang te in Chapchar Kut Programme hi nilen pui a ni a. Joint MHIP in Kut lawmtu zawng zawng te tan Chhawnghnawhna huaihawt in mipui pual in Chai leh lamna hun te buatsaih a ni.