Vawiin khan Zoram chhung hmun dangte rualin  GSA Playground Mamit- ah Chapchar Kut ropui taka hman a ni a, Pi Lalbiaksangi, District Bawrhsap chuan Kut Nu a ni.

Kut Nu Pi Lalbiaksangi chuan mizo te tana kut pawimawh ropui leh ngaihhlut hlawh ber Chapchar Kut hmangtu kalkhawm zawng zawngte kut chibai a buk a, Chapchar Kut chu mizote kut ropui ber anih angin mizo hnam nun chawisanna leh chhawm nunna atana kan hman a pawimawh hle a ni a ti.

Mizo pi leh puten inremna kut atana an lo hman thin chu,  keini pawhin rem loh kan lo neihte rem leh  nana kan hman chuan a lawmawmin kut hlu tak a ni dawn a ni a ti bawk.

Kumin 2018 Chapchar Kut thupui "Sem sem dam dam ei bil thi thi"  tih chu mizo pipu te nun ze mawi tak, midangten chang tam se, ei tam se tihna thinlung kha chhawm nungin tunlai nuna kan khawtlang nun leh  khawsak hona-ah pawh he nun zemawi tak hi hmang  ila kan khawtlang nun a nuam hle dawn a ni a ti, kumin chapchar Kut chu mizo nun ze mawi tlawmngaihna, dikna leh rinawmna kan chhawm nun thar nana hmang theuh turin kalkhawm kut hmangtute a chah a ni.

Chapchar Kut Mamit-a hmanna hun hi hun hniha then a ni a, hun khatna hi Pu Zatluanga, President Sub Hqrs YMA chuan a kaihruai a, Hun hnihna-ah hian  Pi Sapliannguri President Sub Hqrs MHIP chuan Sem Sem Dam Dam, Ei Bil Thi Thi tih hmangin thusawina  a nei a,  zaithiam leh hnam lam chi hrang hrang hmangin hun hlimawm tak hman zui niin Mamit Khawpui chhunga YMA Branch paruk te atangin Cheraw leh Parlam a huhova entirna neih a ni a, hei bakah hian YMA branch hrang hrang atang hian Mizo infiamna Kalchhet, Insuknawr, Saihruipawh leh Inkawibah hmang ten inelna neih a ni bawk. Khawpui chhung YMA branch hrang hrangte hian Mizo hnam lam chi hrang hrang an entir bawk a, Khawpui chhung bakah District chhunga zaithiam tak tak ten kalkhawm mipuite an awi a ni.

Chapchar kut 2018 ah hian kalkhawmte atangin Chapchar Kut  Miss thlan a ni a, Kut Miss atan hian  Hmingthanzuali Kawrthah chu thlan niin 2 -na ah hian  Malsawmdawngkimi, Bazar veng, Mamit a ni a, pathumna ah hian Vanlalbiaki Luangpawl, Mamit chu thlan a ni bawk. Kut Tleirawl ah Liansangpuii Hmarveng leh H.D Lalfamkima, Chhimveng te chu thlan an ni bawk a.  Kut naupang ah hian  Manasea Lalramdinpuia Chhimveng leh Lalbiakfeli Venghlun te thlan  an ni. Chhimveng YMA ten hmanlai mizo siapsuap inbel hun lai atanga leh tun mek a,  kan nunphung leh incheina lantirna costume parade entirna an nei a, Khawpui pawn atangin Kawrthah YMA te chuan Hnam lam entirna an nei bawk a, naupang pawnto entirna neih a ni bawk.