Ka chhulkhatkualpui hmun hrang hranga Zohnahthlak awm te vawiin Chapcharkut hun lawmawm takah hian in awmna hmun theuhah in zavaiin duhsakna chibai ka buk a che u. chapchar Kut hi Zohnathlakte, a bik takin Zoram kan tih chhunga awm te tan chuan Kut Ni ropui tak a ni a. Tun hma in kan lo hmang uar hle thin a; tin tunhnu deuhah te pawh kan nu leh pa, kan pi leh pute pawhin Aizawl khawpuiah ngei pawh an hmang thin a. Amaherawh chu hun engemawti atang khan Kristianna nen a inmilo anga ngaihna te a awm avangin han chawlh lailawk ve rih a ni. Amaherawh chu, thangthar lo awm leh zelte, mi tam takin kan culture te, kan tradition te leh kan nunphung ziarang hrim hrimte hi kan chawimawi leh in kan chawilar leh tur a ni tih rilru a lo chhuak a. Chuvangin tunhnuah deuhah phei hi chuan Central YMA te kaihhruaiin an bultumin Aizawl khawpui bakah Zoram district hrang hrangahte kan lo hmang leh ta a; hei hi thil lawmawm tak a ni.
Chapchar Kut hi Inremna Kut a ni a, thenawm khawveng innghirngho te inrem nan te; tin, nu leh pa karah inhriatthiamlohna awm inhriatthiam leh nan te leh khua leh khua te pawh inremna tur atan Chapchar Kut hi an lo hmang tawh thin a. Vawiinah pawh Zoram chhung leh Zoram pawna Zohnathlak zawng zawngte pawhin inhriatthiam nan leh kan in unauna tihtharna hunah kan hman theih chuan a lawmawm ngawt ang. Niikum lamah khan "Aia Upa zah" tih kha kan thupuiah kan hmang a; kuminah hian Chapchar Kut Committee in " Sem sem dam dam; ei bil thi thi" tih Mizo thufing mawi tak hi kan hmang a ni. Chuvangin hemi rilru pu hian kut pawh hi hmang ilangin hlimhlawp nan ringawt ni loin Mizo kan nihna a kawng hrang hranga zuk phawk a, Mizo dik tak kan nih leh theihna atan min hruaitu ni se, rinawmna, dikna, taihmakna te pawh a thara min neihtir tu ni se. Chapchar Kut hlimawm tak leh hlawhtling tak kan hmang thei dawn a ni.
Aizawl khawpuiah - kan hmanna hmunpui ber a ni a, District hrang hrangah te pawh hman mek zel a ni a; heng kan hman theihna tur atan a tha thawhtute, sum leh pai sengtute leh hun tam tak sengtute hnenah lawmthu kan sawi a. Chapchar kut in a tum ang ngei in kumin Chapchar Kut kan hman hi 'sem sem dam dam; eibil thi thi' tih piahlamah Zoram pumpuia khua leh tui, ram leilung fate leh Zoram pawna kan chhulkhat kualpuite pawh inpumkhat tharna, inthianthat thar na atan he Chapchar Kut hi kan za tan malsawmna ni se ka duh tak meuh a ni. Tin, hetianga ropui taka hmang theia min siamtu Pathian leh Chapchar Kut Committee - he hmalakna leh thahnemngaihna bakah a hlawhtlin theihna tur atana tha leh zung, hun senga he ni hmangtute hnenah lawmthu ka sawi a.
Tin, hun lo kal zelah phei chuan Tourist kan tih mai, zin veivakmite a tam thei ang ber hip zawnga kan kal chhoh pawh hi kan tihtur niawm tak a ni. Vawiin hun lawmawm takah hian Chapchar Kut hmangtute zawng zawng -Zohnahthlakte - in hmanaah leh in awmna apiangah duhsakna chibai ka buk a che u.
Ka lawm e.
Lal Thanhawla
Chief Minister,
Government of Mizoram
