Mizoram mipui duhtak te u,chibai

Ka nupui nena Krismas leh Kumthar Mizorama kan hmang leh thei hi kan lawm em em a. Krismas vawi thum kan hmanna a ni tawh dawn a, Mizote nelawmna leh thatna te hi a takin kan hmu a ni. Thinlung takin Mizoram mipuite Krismas leh Kumthar chibai kan buk a cheu.

Krismas hi inremna leh muanna hun a ni a. Hemi Ni hian, Pathianin a fapa mal neih chhun Isua Krista chu Amah leh mihringte inrem lehna turin a rawn tir a ni. Chuvangin, kan mihringpuite nena inremna kan siam hi a pawimawh em em a. He thu hi kan hun tawn meka, innghirnghona leh endawngna karah hian a pawimawh leh zual a ni.

Kum 2017 kha Mizoram tana kum chhinchhiah tlak tak a niin ka hria a. India ram President chuan Urban Housing Complex rawn hawngin, Prime Minister pawhin 60 MW Tuirial Hydel Project a rawn hawn bakah ei leh bar dinhmun hmasawn nan hmalakna thahnem tak kan nei a ni. India ram hruaitu te ina min rawn tlawh thei hi kan State tan a tha in, hmasawnna tam tak hmahruaitu pawh a ni ang.

Faina hi kan nunphunga bet tlat a ni a, ka lo hriat danin Open Defecation Free (ODF) State-a kan inpuang tep hian min ti lawm em em a ni. Hei hi hlawhtlinna ropui tak a ni a, fai hi Pathian anna a ni si a.

Infiamna lamah ramchhung leh khawvel pum huap pawhin hma kan sawn zel a. Aizawl FC chuan hmarchhak bial atanga I-League no mawi chawi thei hmasa ber niin, Bulgaria rama 3rd International Boxing Championship-ah Lalfakmawii Ralte chuan Gold Medal a la a ni. Heng ka tarlan te hi kan State leh India ram tihmingthatu zinga tlemte chauh an ni. I titha lutuk, Mizoram!

Zirna lam kan en chuan, Chhingchhipah Sainik School kan nei ve ta a, kum thar atang chuan hmeichhe naupang an lut ve thei tawh dan a, hei hi kan tana Krismas thilpek hlu tak a ni. Mizoram hmeichhe naupang luh tir hmasa bertu kan ni tur hi kan ram tana thil chhinchhiah tlak tak a ni a. Hmeichhe dinhmun chawikan leh hmeichhia leh mipa intluk tlannaa hma kan hruai hi hlawhtlinna lian tak a ni.

Inkal pawh tawnna, a that tawk lohna a ni zawk mah awm e, Mizoram hmasawnna tana innghahna bulpui ber a la ni reng a. Kawng tha zawkte kan mamawh in, kan ngaihpawimawh hmasak a tul a. Kum tharah chuan internet hmangin Mizoram hi thlunzawm vek kan tum tur a ni. Vantlang mipuite chhia leh tha hretu an nih angin, kan leilung chhe zel tur ven hi kan tih makmawh a ni a. Hetiang lama Chite lui chhan chhuah leh ngai awh tir tura tha kan thawh te hian fak a phu a ni.

Kumthar leh hmalam hun kan thlir a. Prime Minister hmathlirna New India 2022 kan thlawp rualin, New Mizoram thlir ila. Kum 2022 a lo thlen meuh chuan, New Mizoram inthlak danglam tawh tak Asia Chhimchhak khawmual leh a piah lam thleng te tana kawtchhuah, Mizoram hrisel leh hlawhtling, a nih tur ang ni tawh siam i tum ang u.

Mihring hmasawnna lamah chuan, kan ziak leh chhiar thiamnate hi eizawnna tlaka kan chan tir hi kan tih tur hmasa ber a ni a. Kan thalaiten sawrkar hna chauh an zawng niin a lang a, kan thiam thil hmanga eizawnna tur pawh a tam a ni. Midangte nena kan inbiak pawh tawn nan leh hnam inpumkhat nan tun aia nasa zawka Hindi hman hi kan uar a ngai a. Chumi bakah, mipui hrisel zawk nan hma kan la nual a, Healthy Mizoram Campaign, Project Himna-MADAT leh yoga ang te hi. Heng hmalaknate tihlawhtling tur hian in zavaia thlawpna a ngai a. A bik takin kan thalaite ngaihven turin ka sawm cheu a ni.

Mizoram hian leilung hausakna la deh chhuah loh a ngah a, a hausakna haichhuak tur hian ramchhung leh ram pawn atangte in sum tam tham tak a ngai a ni. Tourism, agriculture leh horticulture te hi kan ngaihpawimawh hmasak a ngai a. Ei leh bar kawnga hmasawn tur chuan midangte thawhpuiin, inlaichinna tha kan siam a ngai a ni.

Kum 2018-ah chuan Mizoram Legislative Assembly member turte kan thlang leh anga. He inthlanna hi a thianghlim in, khawtlang thatzia pholangtu a nih leh ngei ka beisei a ni.

Ka thuchah tihtawp nan Mahatma Gandhi thu sawi te zinga ka duh ber ka han tarlang ang e –

“I do not want my house to be walled in on all sides and my windows to be stuffed. I want the cultures of all lands to be blown about my house as freely as possible. But I refuse to be blown off my feet by any. I refuse to be an interloper, beggar or slave.”

Mizoram mipuite hlim leh lawm taka Krismas leh Kumthar in hman theih nan duhsakna ka hlan a cheu.

KA LAWM E

Jai Hind