Mizoram mipuite, chibai

Mahatma Gandhi pian champhaphak vawi 148-na kan lo thlen hian, Swachhta hi Sewa campaign kan hriat chhuah thar a tha in ka hria a. September ni 15, 2017 khan Chief Minister leh mi pawimawh tak tak te telin hawnna ka lo nei tawh a nih kha.

Keini tluka he campaign hlutna hrethiam tur an awm lova, a khawtlang ang pawhin faina hi kan inchhuanna niin, Mizorama kan nunphunga bet tlat a ni. Kan ram chhunga faina beihpui thlak hi kan tan chuan thil thar a ni hran love. Faina lama kan khawtlang thawhhona hi midangte entawn tlak a ni.

Phur takin Mizoram hi faina kawngah chuan kan rama titha berte zing ami a ni tih ka sawi ngam a. District pariat zinga panga te chuan pawna mimal inthiar awm lohnaah inpuangin, district dang pathum pawhin an inpuan thuai theih nan chak takin hma an la mek zel a ni.

Prime Minister-in mipuite khawtlang tana thawkho tura a kohna hi a hun ka ti hle a. Tha thar nena mitinin faina lama awmze neia hma kan lak ka duh a. Chhungkaw tinin inthiarna thianghlim neih i tum theuh ang u.

Open Defecation Free (ODF)-a vawikhat inpuan hi duhtawk mai lovin, nih chhunzawm zel ila. Mahatma Gandhi pawhin ‘faina hi Pathian anna’ a lo tih kha. Mizoram puma khawpui fai inelna neih mek hian min ti lawm hle a, hetianga kan zavaia kan tel theihna inelna hi chhunzawm zel a tha a ni.

Chite lui ti nung leh tura khawtlang thawhhona hi tarlan ka duh a. Krismas thilpek atan ODF Mizoram leh Chite lui thianghlim kan inpek theih ka beisei a ni.

Vawiin hi Mahatma Gandhi pian champhaphak a nih mai bakah International Day of Non-Violence a ni a. Mizoram hi state ralmuang berte zing ami a ni hi a ropuiin, a ralmuanna hi vawng nung zelin, tharum thawhna lakah inthiar fihlim ila. Chi leh chi inthliar lohna hmun nuam tak a nih chhunzawm thei ngei ang.

He Gandhi pian champhaphak ah hian chibai ka buk nawn leh che u a, ‘Swachhta Hi Sewa’-ah pawh hlawhtlinna in chan ngei ka duhsak a che u.

Ka lawm e.

Jai Hind.