Thiante u,
Vawiin India Independence Day vawi 71-na ah hian he ni ropui tak lawm tura lo kal khawm te leh Mizoram mipui zawng zawng te chibai ka buk a che u. Zalenna Ni kan lawm hian ram tan inpekna thuk zawk min neihtir se la, kan ram in dinhmun sang zawk a thlen theih nan theihtawp chhuah tura inhlan thar lehna ni atan i hmang ang u.
Vawiin ah hian India ram zalenna atana an nunna hlu tak hlantu martar te zahna chibai kan buk a. India ram zalenna atana hma hruaitu mi ropui Mahatma Gandhi te, Netaji Subhash Chandra Bose leh hruaitu hmasa te kha i hre reng ang u. Anni ho kha hma lam hun eng pan thei tura min fuihtu leh kan kawng lo entu te an ni.
Sorkarin a hna thawh te, mipui tana langtlang leh rintlak a nih theih nan kawng hrang hrang in hma a la a. Kum khat kal ta chhung khan kan khawtlang dinhmun leh, ram sum leh pai dinhmun chawikan na turin nasa taka tan lak a ni a. Vawiinah hian a then a zar chauh han tarlang ila.
1. Ram chhung muanna boruak vawnhim leh mipuite himna hi sorkar ngaih pawimawh ber a ni fo va. Kum kal ta chhung khan ram chhungah dan leh thupek bawhchhiatna lian tham engmah a thleng lo hi thil chhuan tlak a ni a. India rama state ralmuang ber pakhat ni zel thei tura thawktu zawng zawngte chungah lawmthu ka sawi tak meuh a ni. National Crime Records Bureau(NCRB)chuan Mizoram hi CCTNS tih puitlin kawngah India rama hma hruaitu state zingah a chhiar tel a. Mizoram district 8 a Police Station 40 zinga 20 ah te chuan CCTNS system ah online data entry tha taka kalpui reng a ni a. A dang 20 ah te erawh chuan internet connection that tawk loh vangin data enter hna hi offline a kalpui a ni. Aizawl City Surveilance Project chu Aizawl khawpui hmun pawimawh deuh deuh te tuam chhuak turin a thawh thumna atan kalpui mek a ni a. Tunah hian CCTV 186 dah a ni tawh a. Tahrik ni 15.9.2016 leh ni 23.9.2016 ah te khan Serchhip District-a Chhiahtlang ah leh Mamit District-a Sabual-ah te District Jail hawn thar a ni.
2. New Land Use Policy(NLUP) hmalakna te a tlangpuia thlirin a hlawhtling thawkhat hle tih a hmuh theih a. He hmalakna hian beneficiary te sum lak luh a tih pun bakah sum leh paia kan ram dinhmun pawh a chawikang a ni. NLUP sawi chhetu thenkhatin beh chhan awm lem lovin NLUP hi hlawhchham angin an sawi hnawm thin a. Chutianga sawiseltu ten an hriat atana ka duh chu kum 2015-2016 tawp thleng khan NLUP Phase 1 leh 2 te zawh fel a ni a. Phase 3 leh 4 te hi nakum March, 2018 ah zawh fel beisei chauh a ni a. Project zawh hma a a rah hmuh nghal beisei hi a dik lo va. NLUP sawiseltu te hian thlai thenkhat, serthlum, kuhva, rubber ang te hian puitlin nan kum 7 kum 8 lai te an duh tih an hriat a tha a. Hetih lai hian thlai thenkhat puitling hma deuh zawkah te chuan eizawnna trade zawng zawng tih theihah hlawhtlinna hmel duhawm tak a lang a ni.
Mizoram Sorkar hnuaia Economic Survey Report, 2015-16 in a tarlan angin tlangram lo neihna hmun hi za zela 40% a a tlak hniam laiin buh thar erawh za zela 31.54% in a pung a. Soil & Water Conservation Department hmalakna hnuaiah hmunphiah thar pawh a let 22 laiin in a pung a. Kum 2009-2010 a hmunphiah thar chhuah chu 1199.97quintals, a sum hlutna a chhutin cheng nuai 37 a ni a. Kum 2015-2016 ah chuan thar chhuah hi 26,449.13 quintals, niin a sum hlutna a chhutin cheng nuai 6,600 man lai a tling a ni. NLUP kalpui tan tirha Mizoram in silk pangngang chi a thar chhuah chuan silk pangngang khawia eizawngte mamawh za zela 5% vel awrh a phuhruk a. NLUP hmalakna avangin silk pangngang chi ah ram kan intodelh tawh bakah cocoon kan thar chhuah pawh kum 2011-2012 a 76.10 MT atangin kum 2016-2017 ah chuan 375.20 MT ah a pung a, Mizoram cocoon thar chhuah hi a let 5 laiin a pung a ni. Sawiselna hrang hrang karah AH&Vety department hmalakna in rah tha a chhuah a. NLUP kalpui tan atanga kum 2 na ah bawng natna Foot&Mouth Disease leng avangin ran eng emaw zat an thi a. Amaherawh chu department hmalakna avangin bawnghnute thar chhuah chu kum 2012-2013 a 13,639.19 tonnes atangin kum 2015-2016 ah chuan 21,997.11 tonnes ah pungin bawnghnute punna hi za zela 61.28% lai a ni. Chutiang bawkin sa ah pawh thar chhuah punna hi kum 2012-2013 a 12,076 tonnes atangin kum 2015-2016 ah chuan 13,591.6 tonnes a ni a, za zela 12.55% in a pung bawk a ni. Micro enterprise ah auto-rickshaw te hi NLUP hlawhtlinna tilang chiangtu pawimawh tak an ni.
NLUP kalpui tan tirh khan thlai chi leh thlai tiak kan mamawh za zela 5% emaw chauh ram chhungah kan thar chhuak a. Kum 2015-2016 a ral meuh chuan sector tin deuh thaw ah thlai chi quality tha kan intodelh hman deuh vek tawh a, hei hi hlawhtlinna chhuanawm tak a ni. NLUP sawiseltu ten he project ruahmanna leh a kalpui dan, a bik takin baseline survey kalpui dan ah te, compact area huam chin tur ah te, beneficiary thlan chhuah dan ah te, leh he project in nghawng a neih ah te, NLUP hi sawi hnawm tumin theihtawp an chhuah a. Hetianga an sawiselna te hi uluk taka enfiah a ni a. Chuta hmuh chhuah chu hetiang hmasawnna project lian tham kalpui leh enkawl na ah hian khawi emaw lai ah duhthu sam ang thlapin engkim sawiselbo ni vek lo mah se, he project hian University of Minnesota leh UN Agencies hrang hrang te tiamin mithiamte ngaihhlut a hlawh a. A dik tak chuan mipui kuta ram hausakna sum leh pai luh theihna tur te, leilung leh boruak chhe zel tur venhimna atan leh loneitute thawhchhuah a leta tih punna tura Prime Minister-in ram hmasawnna programme thar a duan tam tak hi NLUP ruahmanna hian a lo hma khalh a ni.
Sector thenkhat tlem te ah harsatna eng emaw vangin beisei ang hlawhtlinna hmu vek lo mah ila, sector tam zawka kan hlawhtlinna hi a lungawi thlak a. NLUP hlawhtlinna hi pawn lam atanga NLUP enfiahtu, Third Party Evaluation Team, Ministry of Agriculture hnuaia NABCONS leh Mizoram University te hmuh dan hian a nem nghet a ni. India ram sum leh pai dinhmun Gross Domestic Product(GDP) chu kum 2015-2016 ah khan za zela 7.6% a than laiin Mizoram GDP chu za zela 9.18% a ni a. Hemi rual hian India ram pum per capita thanna chu za zela 7.4% a nih laiin Mizoram per capita income chu za zela 11.27% a ni a. GDP leh per capita income ah pawh India ram pum aiin kan thang duang zawk a. NLUP hi hetianga kan hmasawnna thlentu pawimawh ber pakhat a ni. NLUP hlawhtlinna hi a pawmtlak leh tlak loh ti chiang turin a zau thei ang bera zirchianna neih mek a ni a. Hetiang zirchianna hi ram pumah chuan mi za zela 5% -7% velah neih thin a nih laiin NLUP beneficiary za zela 75% ah zirchianna hi neih a ni a. A thawh khatna report ah chuan a lungawi thlak hle a. Hun remchang ah he zirchianna report hi chipchiar zawka la tlangzarh tur a ni.
Kum 2013 State Assembly inthlan dawna kan intiamna angin state sorkar chuan NLUP hi a tira ruahman anga kum 5 chhung kalpui hnu ah kum 5 dang kalpui chhunzawm leh turin ruahmanna a siam a ni.
UN Agency hrang hrang, UNIDO, FAO, UNDP leh ILO te nena thawh hona atangin hma thar eng emaw zat lak a ni a. An report nghah mek a ni a. NLUP in a thil tum bulpui, mi zawng zawng huap hmasawnna te, eizawnna ngelnghet leh rintlak siam belh kawngah te, hlawhtlinna kan hmu ngei ang tih hi a rinhlelh awm lo va. Beneficiary ten an thlai puitlin hun an nghah chhunga an intun nunna tur ngaihtuah sak an mamawh tih hria in sorkin anmahni khaichhuah nan NLUP ah sum tam zawk dah a tum a. Retheihna hi chhungkaw tam takte nitin khawsakna mamawh neih theihna kawng daltu a nih chhung chu NLUP hi kalpui chhunzawm a ni ang.
3. New Economic Development Policy(NEDP) Comprehensive Growth Strategy for Mizoram chu ngawrh taka kalpui a ni a. Ram sum leh pai dinhmun chawikan na tura an pawimawh dan azirin project hrang hrang tan sum pek chhuah a ni a. NEDP atan hian kum 2016-2017 ah cheng vaibelchhe 250 leh NLUP convergence sum vaibelchhe 27 dah a ni a. Kum 2017-2018 ah vaibelchhe 750 dah a ni leh a. NEDP hnuaia hmalakna pawimawh te chu sumdawnna bul tanna tur tih hmasawnna atan Entrepreneurship Development Schemes(EDS) te; Agriculture leh Horticulture link road te; khawpui chhung leh thingtlang khua a hmasawnna ruhrel tih changtlunna te; Referral hospital leh district hospital tih changtlunna tur te; kawngpui, tui, power supply leh khawpuia service industry hrang hrang hmasawnna na tur te; khawpui lian leh tenau zawk te internet connection tha zawka thlun zawmna tur te; hmasawnna hna thawhna tura mamawh zual kawng siamna tur te; khualzinte hipna tur te; hmasawnna ruhrel pawimawh New market Building, Zodin Multi Level Car Parking, Mizoram State Convention Centre etc. leh policy khawih thil thenkhat, Public Financial managment Reforms, Public Administration Reform, Land Reform, Developing Skills Development Policy leh Power Sector Reform te an ni a. NEDP hnuaiah hian Chief Minister’s Rural Housing Scheme pawh kalpui a ni.
Kum 2011-2012 atanga kum 2015-2016 inkar a Mizoram sum leh pai dinhmun thanna hi za zela 9% velah nghet ang reng takin a ding deuh reng a. India ram pumah chawh ruala mi pakhatin kum khata a sum lak luh zat per capita income Rs.93,293 aiin Mizoram per capita income hi a sang zawk daih a ni. Mizoram chu India rama state thang duang, High Growth State, pakhat ni in India ram hmasawnna khalh kaltu te zingah chhiar tel kan ni a. Niti Ayog chuan Mizoram hi state dang pathum, Gujarat, Jharkhand leh Tripura te nen kum 2013-2016 chhunga India rama state thang duang ber ah min chhiarin chawhruala kum khata a thanna hi za zelah 8% aiin a tam a ni.
5. Mizoram sorkar chuan agriculture leh a zawmpui eizawnna peng hrang hrang ten kan ram sum leh pai dinhmun hma sawnna ah nasa takin kawng ro an su tih a hria a. Agriculture Link road 416Km laih turin ruahman a ni a, kawng awmsa 95Km a thui chu kum tluana motor tlan thei tura chei that mek a ni. Hna hi 50% vel thawh zawh a ni tawh a. Hemi atana sum pek chhuah tawh zat chu cheng nuai 2107.50 a ni. NEDP hnuaiah ram 114.13hectares a zauvah Purunsen chin a ni a, 468.07 quintals thar chhuah a ni a. Thlai chinna hmuna zau hrang hrang inkalpawhna tur kawng 773Km a thui laih na tur ruahmanna siam a ni a. RKVY hnuaiah National Mission on Oilseeds leh Oil Palm(NMOOP)kalpui tan atangin Link road 876.11Km a thui laih a ni tawh a. Lengpuia KVK hmunah Central Instrumentation Laboratory chu kumin January, 2017 khan hawn a ni a. He Laboratory hi agriculture lama mithiam ten research an kalpuina ah an kut tihchak nan hmanraw tha leh changkang zawk a anmahni thuamna turin din a ni.
Rural Infrastructure Development Fund(RIDF)sum, cheng nuai 551.08 sengin darkar khata 8 metric tonnes her chhuak thei, ran chaw siamna, Animal Feed Plant chu Ramrikawn Tanhril-ah bun a ni a. Thianghlim zawka sa ei tur buatsaih nan Bawngkawn Brigade Field-ah cheng nuai 387.24 sengin Rural Slaughter House sak a ni a. Agriculture hmasawnna tura ruahmanna lian, Capacity Enhancement for Sustainable Agriculture and Irrigation Development in Mizoram atan Mizoram sorkar leh Japan International Cooperation Agency(JICA) te chuan nikum October ni 26, 2016 khan thawh dunna tur thuthlung an ziak fel a. Silk quality tha thar chhuah na turin NERTP hnuaiah Intensive Sericulture Development Project(ISDP) chu cheng vaibelchhe 32.49 sengin Lunglei District-a chhungkaw 600 tuam chhuakin ngawrh taka kalpui mek a ni a. Scheme thar, Neel Kranti Mission Plan, Blue Revolution tia vuah bawk hnuaiah sangha khawia eizawnna lam tih hmasawn na turin kawng hrang hranga hma lak a ni bawk a. He scheme hmang hian 10hectare a zau ah sangha dil laih thar a ni a; 50hectare a zau sangha dil awm sa te chu thawm that leh chei thar hna thawh a ni bawk a; sangha chi siamna Hatchery thar 4 leh Sangha chaw siamna Fish Feed Mill unit 1 sak thar a ni a, Bawngkawn-a Ice Plant chu tih changtlun a ni bawk.
6. Kum 2016-2017 chhungin kawng 68Km a thui laih thar a ni a; 218Km ah kawng chhuat black top hna thawh zawh a ni bawk a. Cheng vaibelchhe 3736.22 sengin kawngpui 57, a vaia thui zawng belhkhawmin 1,640 Km siam a ni a. Kum 2016-2017 chhung hian Lei pathum, Chhimtuipui Darzokai ah te, Tlawng lui Bairabi-Zamuang road ah leh Tut ah te siam zawh a ni. CRF leh NABARD scheme hnuaiah vaibelchhe 63.35 sengin Lei hlui 8 thlak nan a thar sak mek a ni a. Kum 2016-2017 chhung vek hian sum ruahman, cheng vaibelchhe 523.40 sengin building 145 sak a ni a, 37 chu zawh tawh niin 108 dang te pawh chak taka hna kalpui mek a ni.
World Bank Project atangin Chhumkhum-Chawngte Road te, Champhai-Zokhawthar Road te, Tlabung-Kawrpuichhuah Road siam that hna thawh mek a ni a. Asian Development Bank sumin Serchhip-Thenzawl-Buarpui kawng chei that hna pawh chak taka thawh mek a ni. Mizoram PWD chuan National Highways kawngpui 11, a vaia belhkhawmin 1465.938 Km a thui a enkawl a. Kaladan Multi Modal Transit Transport Project, vaibelchhe 1011.52 senga thawh mek chu tluang taka kalpui a ni a, nakum 2018 hian zawh beisei a ni. Pradhan Mantri Gram Sadak Yojana(PMGSY) hnuaiah kawng 1758.30Km a thui laih hna leh 736.61Km a thui kawng chhuat blacktop hna thawh zawh a ni a. Project 25 dang pawh thawh mek a ni a. Tun hnai lawkah kawngpui 56 siamna tur cheng vaibelchhe 553.40 sanction hmuh a ni a. Hemi atan hian tender koh mek a ni. NLCPR hnuaiah Helipad 10 siam a ni a, 8 chu zawh a ni tawh a, heng helipad 10 siam nan hian cheng nuai 258.20 sen a ni.
7. Mizoram sorkar chuan ram hmasawnna atan electric power a intodelh pawimawh zia a hria a. Hydel project hrang hrang, 5MW Tlawva SHP; 4MW Kawlbem SHP; 100kW Turiza MHP leh 100kW Tuichang MHP siam hna thawh mek te chu tluang taka kalpui a niin kum 2018-2019 chhunga zawh hman beisei a ni. NEEPCO in 60MW Tuirial HEP siam hna a thawh mek chu kumin ah zawh beisei a ni a. State sorkar hnuaia thawh tur 24MW Tuirini HEP atan DPR siam peih a ni tawh a. He project atana sum ruahman chu cheng vaibelchhe 465 a ni a, kum 4 chhunga zawh tura beisei a ni. 210MW Tuivai HEP sakna tura clearance lak ngai te pawh NEEPCO in an bawhzui mek bawk a ni.
NEDP hnuaiah Aizawl khawpui chhung chawmtu 33/11kV Sub-Stations tih changtlun nan transformer khawl lian leh chak zawk bun mek a ni a, kumin chhunga hna zawh beisei a ni a. NEDP hnuaiah Vankal-a Mega Solar Park siam te; Vathuampui leh Sailam khaw chawm tur Mini-Grid SPV Plant te; 132kV Sub-station Melriat, Khawiva leh Sihhmui a Grid connected rooftop SPV Plant ruahmanna kalpui tum a ni. R-APDRP hnuaiah power sem chhuahna lam tih changtlun hna chu Part-A atan cheng vaibelchhe 35.12 leh Part-B ah vaibelchhe 240.41 sengin khawpui 9 ah tluang taka kalpui a ni a. Rural Electricity Distribution Backbone(REDB) hnuaiah Rural Electrification Corporation Ltd(REC) atangin district 8 a 33/11kV Sub-stations 12 tih changtlun nan te, 33/11kV Sub-stations 6 sak nan te, 189 Kms a thui 33kV line hrui zam nan leh 33kV Bays thar 6 sak nan cheng vaibelchhe 77.03 sanction kan hmu bawk a ni.
8. Public Health Engineering Department chuan National Rural Drinking Programme(NRDWP)hnuaia Central sorkar, Ministry of Drinking Water and Sanitation in nuai 2448.75 a rawn pek atangin kum 2016-2017 chhung hian mihring chenna hmun 35 tuam chhuakin tui thianghlim pek hna a thawk a. Swachh Bharat Mission(Gramin) programme hi PHE Department hna pawimawh ber pakhat a ni. Kum 2016-2017 chungin inthiarna, Individual Household Latrine 2085 sak a ni a. Vantlang inthiarna hmun, Community Sanitary Complex 6 leh bawlhlawh halna hmun, solid waste management sites 5 sak thar a ni bawk. Aizawl, Champhai leh Kolasib District te chu ‘Open Defacation Free(ODF) District ah puan an ni a. Serchhip District pawh tun hnai khan ODF ah puan a ni a, endikna neih mek a ni. NABARD hnuaiah kum 2016-2017 chhungin Tuikuma Diesel Pump site leh Greater Serchhip Water Supply Scheme hnuaia Booster Pump House tih changtlun leh khawl thar a thlak hna te zawh a ni a. Ngopa Water Supply Scheme pawh kum 2017 hian zawh hman beisei a ni. NLCPR sum hmangin Greater Saitual WSS, Bilkhawthlir WSS, West Phaileng WSS, Sairang WSS leh Aibawk WSS te chu kum 2016-2017 chhung hian zawh a ni a. Greater Lawngtlai WSS leh Khawbung WSS te pawh kum 2017-2018 chhungin zawh hman beisei a ni.
9. Zirna hi ram hmasawnna tehfung pawimawh tak pakhat a nih avangin sorkarin hemi lama kan tha tih chak a ngai pawimawh a. Ziak leh chhiar thiam lo ti tlem turin nasa taka tan lak a ni a. Adult Education hmalakna in district pathum, Lunglei, Lawngtlai leh Mamit ah te beihpui thlak a ni. Chhingchhip-a Sainik Shool chu kumin 2017 May ni 17 khan hawn a ni ta a. Entrance test buatsaihah kumin atanga Pawl 6 zir tan turin naupang 60 lak an ni. Rehabiliation Council of India(RCI) chuan Mit leh Beng hriatna tha lo te zirtirna tura a bika SCERT hnuaia B.Ed zirna chu kalpui min rawn phal sak ta bawk a. Hemi rual hian DIET hnuaiah Aizawl leh Lunglei ah te B.Ed Course zirna pangngai pawh National Council of Teacher Education(NCTE) chuan min pawmsak tawh bawk a. Skill Development Initiatives hnuaia “Sub Missions on Polytechnic” scheme atangin Champhai leh Kolasib ah te Polytechnic sak zawh a ni a. Lawngtlai, Mamit leh Siaha ah te pawh Polytechnic sak mek a ni bawk. Govt.Hrangbana College leh Govt.Zirtiri Residential College te chu Model Degree College ah hlangkai a, hemi atana fund nuai 400 dawng thei turin Project Approval Board of RUSA, MHRD chuan kan dilna min pawm sak tawh a. RUSA Infrastructure grant component hnuaiah Govt college 21 tih changtlunna tura tanpuina nuai 200 kan dil chu pawm a ni tawh bawk a ni.
10. Hmarchhak biala a hmasa ber atan Thenzawlah khum 50 awmna AYUSH hospital chu nikum 2016 October ni 27 khan hawn a ni a. Damdawi in hrang hrang(DHs CHCs, PHC) ah AYUSH inentirna OPD 20 lai hawn a ni tawh bawk a. Haulawng, Hnahthial, Thingsulthliah leh Tlabung ah te AYUSH OPD building sak zawh a ni a. Mizoram in AYUSH department hnuaiah hian damdawi quality endikna, Drugs Tesing Laboratory changtlung tak Zemabawk ah kan nei tawh a. National Urban Health Mission hnuaiah Sazaikawn UPHC leh Chawlhhmun UPHC sak zawh leh hawn a ni a. Mizoram in Medical College puitling kan neih theih nan, central sorkar leh Mizoram sorkarin 90:10 a sum kan intum sem tura ruahman, cheng vaibelchhe 189 hmangin State Referal Hospital Falkawn chu Mizoram Institute of Medical Education & Research(MIMR) atan buatsaih mek a ni a. Zemabawk-a Mizoram State Cancer Institute tih changtlunna turin central leh state sorkar ten 90:10 a kan intum sem turin cheng vaibelchhe 4.2 ruahmanna chu Ministry of Health & Family Welfare(Cancer Research Wing)chuan administrative aproval min rawn pe tawh bawk a ni. Khum 200 awmna Mizoram College of Nursing Hostel, Falkawn a mi chu kumin 2017 June ni 2 khan hawn a ni a. Siaha leh Lawngtlai a District hospital te tihlen hna pawh thawh mek a ni bawk. Ram pawn atanga dan lova meizial leh vaihlo atanga thil siam lo lut te do nan sorkar leh pawl hrang hrang telna Joint Task Force chu 19th Setember, 2016 khan din niin Joint Operation on Contraband Cigarettes and Other Illegal Tobacco Products chu kalpui a ni. Mizoram State AIDS Control Society hmalakna in AIDS natna laka invenna leh HIV hrik kai tawh te enkawl leh tanpui hna thawh chhunzawm reng a ni a. Tunah hian Mizoram ah mobile testing centre 9 tiamin HIV Testing Centre 37 kan nei a ni.
11. Thingtlang lam hmasawnna leh thingtlanga cheng miretheihte dinhmun chawikan hi sorkar in a ngaih pawimawh ber pakhat a ni reng a. Mahatma Gandhi National Rural Employment Guarantee Scheme(MGNREGS)a kut hnathawktute ni khat tha rawih man chu Rs.188 atangin Rs.194 ah tihsan a ni a. Mizoram chu Indira Awaaz Yojana(IAY)/Pradhan Mantri Awas Yojana-Gramin(PMAY-G)hmanga thingtlang mi rethei, BPL chhungkua te chenna in siam sak ah ti tha ber state 12 zingah telin chawimawina Gold Medal a dawng a ni. Hemi rual hian Shyama Prasad Mukherji Rural Mission(SPMRM) ah pawh Mizoram chuan a tih that avangin hmarchhak bial bikah Outstanding Performance chawimawina a dawng a. India ram pumah Andra Pradesh dawttu niin Pahnihna a ni bawk. He Scheme hi RD Block pahnih, Aibawk leh Thingsulthliah Cluster ah te kalpui a ni.
Border Area Development Programme(BADP) hnuaiah Minisry of Home Affairs, Department of Border Management atangin hmasawnna hna hrang hrang 572 thawh na tur sum, cheng nuai 4611.66 hmuh a ni a. NLCPR sum hmangin E.Lungdar ah Mini Sports Complex; Saitual leh Khawbung ah Multi Shopping Complex leh Vairengte-ah Market building sak hna te ngawrh taka thawh a ni bawk.
12. Khawpui chhung hmasawnna turin sorkarin kawng hrang hrangin hma a la a. Chung te chu (i)Khawpui enkawlna hna inrelbawlna te; (ii) Khawpui hmasawnna ruhrel te; (iii)Khawpui tana ruahmanna siam te; (iv)Khawpui vawn thianghlimna te;(v) Khawpui chhunga veivahna lam te; (vi) Khawpui mirethei te dawm kanna te a ni a. Khawpui lo thang zelin a chhunga chengte tana harsatna a rawn ken tel te sutkianna turin kawng hrang hranga hma lak a ni. Heng te hian central sorkar hnuaia Central Scheme leh Mission hrang hrang te pawh a huam tel a. Mizoram Annual Plan sum leh Central Sector Scheme kalpui nana sum kan hmuh hmangin state sorkar enkawlna hnuaia project eng emaw zat thawh mek a ni a. Tunah hian Central Sector Mission 5- Swachh Bharat Mission(Urban); National Urban Livelihood Misson(NULM); Atal Mission for Rejuvenation and Urban Transformation(AMRUT); Housing for All(Uban)leh Smart Cities Mission te hmangin khawpui hmasawnna hna ah bung thar kan kai a. Ministry of Housing and Urban Affairs-in Smart City Competition a buatsaih ah Mizoram chu hlawhtling takin a tel ve a. Aizawl Smart City hna thawh nan vaibelchhe 500 Mizoram-in a dawng dawn a ni. NEDP atangin Aizawl khawpui hmasawnna ruhrel siam belh zel a ni a. Rajiv Gandhi Stadium ah Modular Gallery sak a ni a. ADB hnuaia NERCCDIP sum vaibelchhe 698.17 chu khawpui hmasawnna tur project lian pathum, khawpui chhunga tui supply na, khawpui thli luanna leh bawlhhlawh sawngbawlna hmun buatsaih nan te hman a ni. Heng hmalakna atang hian Aizawl khawpui hian nitin darkar 24 chhung tui supply te, khawpui bawlhhlawh thli luanna mumal tak leh bawlhhlawh sawngbawlna tha kan neih theih ngei a beiseiawm a. Aizawl khawpui chhung vawn faina atan SIPMIU chuan bawlhhlawh phurhna tur motor 54 a lei bawk a ni.
13. Kan ram leilung leh boruak, sik leh sa venhim na turin State Action Plan on Climate Change (SAPCC) duan fel a ni a. Department 3 - Agriculture, UD&PA, EF&CC - ten central sorkar MoEFCC hnenah cheng vaibelchhe 10 ruahmanna, Climate Change Project an theh lut tawh a. Heng zinga pakhat, Agriculture department project ‘Sustainable Agriculture Development Through Expansion, Enhancement & Modelling’ chu pawm (approve) ni tawhin he project hian district 4 a huam dawn a ni. EF&CC department chuan wildlife management hnuaia CSS pahnih - Project Tiger leh Integrated Development of Wildlife Habitat (IDWH) - a kalpui mek chuan Protected Areas 10 a huam bawk a. Kumin Green Mizoram Day khan thing 74,454 phun a ni.
14. Kum 1998 December ni 12-a hawn, Lengpui Airport chu ram chhung khawpui pawimawhte nen thlun zawm vek a ni ta a. Guwahati leh Kolkata bakah Delhi leh Mumbai inkarah direct flight a awm tawh a. Air India, Jet Airways leh Spice Jet te an service mek bakah Indigo, Deccan Chartered Zoom Air leh IIC Technologies (Air Charter) ten tun atanga reilote ah Lengpui Airport atanga service turin dilna an theh lut tawh bawk a ni. Mizoram chhimlamah airport mamawhna a sang hle a, Siaha leh Lawngtlai inkara New Latawh tlang chu preliminary survey zawh a ni tawh a, a hmunhma pawh tha tawka hriat a ni a. Hemi atan hian Detailed Project Report buatsaih mek a ni. Mualpui-a Rajiv Gandhi Stadium bulah State Helipad siam mek chu peih fel tep a ni bawk.
15. Food Security hnuaiah Central sorkar atangin AAY leh PHH beneficiary-ten man tlawm zawka an lei tur buhfai 5478.93MT lai kan dawng a. FCS&CA department chuan Non-NFSA beneficiary-te hnena thla tina semchhuah tur buhfai 70,000 quintal chu local purchase hmangin a lei a. Kumin fur chhunga thingtlang khaw kilkhawr zual 207 a cheng ten buhfai an nghei loh nan supply centre 46 ah May-September 2017 chhung tla tur buhfai chhek khawl a ni. Department hnuaia District office, Supply godown, depot leh ration card te chu tun hnai ah digitised vek a ni tawh. IOCL inkaihruaina dan zul zuiin Refill Booking System (Online Refill) pawh state hmun thenkhat, a bik takin Aizawl leh District khawpui ah te chuan ni 19.6.2017 atangin kalpui tan a ni tawh a ni.
16. Aizawl District Court building thar tur chu New Secretariat Complex, Aizawl-ah cheng vaibelchhe 23.60 sengin sak zawh fel tep a ni a. New Secretariat Complex-ah vek High Court Building sakna tur cheng nuai 4624.12 chu NLCPR hnuaiah DoNER-in a pawm tawh a. A satu tur Contractor pawh thlan fel ni tawhin, work order pek chhuah veleh hna tan mai tur a ni. Kolasib-a Judicial Quarters thar chu cheng nuai 502.73 sengin sak zawhfel a ni a. Lokayukta din a nih theih nan chak takin hma lak mek a ni a. Tunah hian Bawngkawn-ah mi in luah hawha office hawng turin tih fel a ni tawh a. Anmahni puala office building sakna tur hmun chu GAD-in New Secretariat Complex, Khatla-ah a ruahman sak a ni.
17. Khuarel chhiatrupna a thleng fo va, nunna leh bungrua eng emaw zat chan a ni thin a. Heng chhiatrupna thlen huna chhanchhuah hna thawk thei turin State Disaster Response Force(SDRF) mi 802 te chu pre-hospital treatment, collapsed building structure, water rescue, alpine rescue leh urban search and rescue training pek an ni a. Volunteer 1500 chuangte chu khawtlang anga Basic First Aid, Search & Incident Management ah training pek an ni bawk a. YMA Volunteer 208 leh Youth Adventure Club member 55 te chu National Disaster Response Forces ten uluk takin Disasater Response Course training an neihpui a ni. Serchhip, Siaha, Kolasib leh Gilead Special School-ah Mock Drill huaihawt a ni bawk a. Aizawl, Kolasib, Mamit leh Serchhip District-ah te Rapid Visual Survey(RVS) neih a ni tawh a. Building him lo eng emaw zat chhinchhiah niin thuneitute hnenah a bawhzui dan tur thehluh a ni.
State pum huap leh khawtlanga hman tur Disaster Management Plan duan fel a nih bakah Aizawl, Siaha leh Lawngtlai District-ah te Hazard Risk Vulnerability Assessment tih zawh a ni. Hunthar lei tlahniam thin lai pawh Geological Survey of India, Shillong atanga mithiam lo kal ten an rawn enfiah a. Detailed Project Report (DPR) pawh sorkar laipuia National Disaster Management Authority hnenah thehluh a ni.
18. Sports & Youth Services hmalaknain New Secretariat Complex-ah Youth Recreation Centre-cum-Amalgamated Office Complex sakna turin NEC chuan sum cheng nuai 1024.42 chu min pawmpui tawhin tunah hian a sak hna tan a ni tawh a. NEC hnuaiah heng project leh hna hrang hrang - Muallungthu-ah Phulpui Multi Sports Centre; Electric Veng-ah Indoor Stadium; Hachhek-ah Sports Infrastructure Development; Darlawn-ah Multipurpose Sports Complex for North eastern Region of Mizoram; Aizawl West Joint YMA Field, Vaivakawn; Sihphir-ah Multipurpose Hall te hi kalpui mek a ni bawk. Mizo hmeichhe Olympian hockey player H.Lalrinfeli chuan India aiawhin Rio Olympic Games-ah a khel a. November 2016-a Women Asian Champions Trophy Hockey Tournament, Singapore-ah Indian Team-a infiammi dangte nen Gold Medal a dawng a. Mizo tlangval Jeremy Lalrinnunga pawhin Common Wealth Youth Weightlifting Championship-ah Gold Medal leh kum 2016-a IWF World Youth Weightlifting Championship, Penang-ah Silver Medal a la a. Tokyo-a Asian Weightlifting Championship November ni 11, 2016-a neihah Silver Medal a la leh a ni. Kum 2016-2017 I-League title la tu Aizawl Football Club te ka lawmpui tak zet a ni.
19. Ministry of External Affairs hnuaia Indian Council for Cultural Relations (ICCR) bultum a VII International Folklore Contest-Festival ‘Flower of The Sun’ June ni 30 atanga July ni 6 chhung Lithuania-a neihah Mizoram atangin Folk Dance entir turin member 12 tirh an ni a. India aiawha kalte hian lawmman 3-na an la nghe nghe a ni. 13th Finance Commission bultumin Falkawn-a Zokhua pawh tih changtlun a ni.
20. Mizoram sorkar in e-governance a kalpuina turah ICT Department chuan a hna thawh that avangin Skoch Award in Smart Governance for the year 2016, leh Skoch Platinum Award for E-District Project &Content Management Systems(CMS) lawmman a dawng a. Hei bakah hian Skoch Award in Inventory management System lawmman pawh a dawng bawk a. Hei hi a takin Mizoram Secretariat ah chuan hman tangkai mek a ni a. Mizoram State Wide Area Network (SWAN) hmanga state chhung hmun hrang hranga Points of Presence (POPs) 42 thlunzawm tawh chu e-governance hmalakna ah hian a tangkai em em a ni. Mizoram hian e-service delivery outlet atan Common Service Centre 136 a nei a. E-service delivery atan hian thingtlang hmun hrang hrangah RIKs 300 bun a ni tawh a. Mizoram sorkar hnuaia E-Office chu November ni 15, 2016 khan hawn a ni a, UD&PA Department chu a hmang hmasa ber department an ni. NEDP hnuaiah Aizawl leh District khawpui-ah te Internet connectivity tihchangtlun nan leh awlsam zawka mipuiten sorkar an dawr theih nan ICT department kal tlanga hma lak a ni.
21. Aadhaar card siam nan Biometric Enrollment(BME)-ah kumin August ni 8 thleng khan mi 8,59,283 thun luh an ni tawh a, hei hi Mizorama mihring cheng za zela 73.50% a ni. Cable TV Network digitize hna chu Phase hnihna thawh a ni tawh a. Phase-III ah khaw 23 tuam chhuah a, Phase-IV ah chuan thingtlang khua zawng zawng tuam zawh hman tur a ni.
22. Tourism eizawnna lama mi tam zawkin ke an pen theih nan department hmun leh building thenkhat te mimal kutah hlan a ni a. Tun thlengin tourist facilities 12 chu kum 10-15 chhung atan mimal hnenah hman hawh tir a ni. Kum 2016-2017 chhungin heng Amobyu (New Maubawk), Saikao (Serkawr), Zyhno (Zawngling), Phura, New Laty (New Latawh), No-Aotla (Niawhtlang) leh Chakhei (Chakhang)ah te hian Tourist Lodge hawn a ni a. Sum cheng nuai 9,907 sengin Mamit-Aizawl inkarah Swadesh Darshan Scheme for Development of Eco-Adventure project buatsaih hna kalpui mek a ni.
23. Mizoram Goods & Services Tax Act 2017 chu July ni 1, 2017 atang khan hman tan a ni ta a. GST hian hun lo kal turah Mizoram-in chhiah atanga sum a lak luh chu nasa takin a tih pun beisei a ni.
Vawiinah hian tlawmngai pawl hrang hrang te, kohhran te, mipui leh media ten sorkar chungah rinna nghata sorkar hmalaknate an tawiawm na ah lawmthu ka sawi a. Vawiina parade contingent te, zirlaite leh mipui kalkhawm zawng zawngte chungah pawh lawmthu ka sawi a ni.
Mizoram a hnam hrang hrang chengte inkara inunauna boruak vawng him turin mimal leh politics hamthatna leh mahni hmasialna dah tha in, kan ram tana thil pawimawh ah chuan rilru hmun khat pua kan tanrual a tul tak zet a. Zalenna sualtuten kan ram tan thui tak thlir a an lo thawh hahna zawng zawng kha tithlawn lovin, a taka chantirtu kan ni tur a ni. Lungrual taka kan thawh ho chuan harsatna eng pawh kan hmachhawn thei ang tih ka ring tlat a ni.
JAI HIND.
