Mizote kut zinga ropui leh hriathlawh ber Chapchar Kut chu vawiin khan Mizoram hmun hrang hrangah lawm a ni a. Chapchar Kut 2017 lawmna pui ber chu  Aizawl Sipai Lammualah neih niin Chief Minister Pu Lal Thanhawla chu Kut Pa a ni a, Art & Culture Minister Pu R. Romawia chuan kut a thleng a ni. A vawikhatna atan kuminah hian thupui thlanbik neiin Chapchar Kut hi hman a ni a. Mizo hnam rohlu ‘Aia Upate Zah’ tih chu kumin Kut thupui atana thlan a ni. 

Kut Pa Pu Lal Thanhawla chuan Zoram dung leh vanga Mizote Chapchar Kut chibai bukin he kut ropui tak hian hmun hrang hranga awm zohnahthlakte chhulkhatkual kan ni tih leh kan awmna hmun theuh hi Pathian min pek a ni tih hre thar leh turin a chah a. Tute mah inla hrang thei kan awm lo tih hriatna hian min phuar khawm se, he Kut hian zohnahthlak inpumkhatna leh inunauna tinghet zel se a duh thu a sawi a ni. Kut Pa chuan kumin Chapchar Kut thupui ‘Aia Upa Zah’ chu Mizo nun ze mawi, thangtharten kan chhawm nun zel tur a ni tiin aia upa te zaha nu leh pa chawimawi thinte chuan malsawmna an dawng thin, a ti a. Zoram thar leh nuam, sum leh pai leh ei leh bara intodelh ram siam turin mi zawng zawngin mawh kan phur a; dikna, rinawmna, taimakna leh Pathian tih a pawimawhzia hriaa Chapchar Kut hi min kai harh thartu nise a duh thu Chief Minister chuan a sawi a ni. 

Kut thlengtu Art & Culture Minister Pu R.Romawia pawhin Chapchar Kut chu inremna leh inlungrualna Kut a ni tiin Mizo nun ze mawi tlawmngaihna, rinawmna, taimakna leh aia upa zah thiam vawng nung zel turin kalkhawm te a sawm a. Chapchar Kut chu hlimna leh lawmna kut anih angin hlim taka Kut hmang turin mipuite a sawm a ni. 

He huna thusawitu dang Central YMA President Pu Lalbiakzuala chuan changkanna karah hnam rohlu vawn nun leh chawilar a pawimawh, a ti a. Kut hmangtuten Mizo thuam inbel duh tawk mai lova Mizo nun mawi a taka nun chhuah pui theuh turin a sawm a ni. 

Chapchar Kut lawmna AR Lammuala neihah hian Mizo hnam nun leh hnam ziarang tilang thei thil chi hrang hrang mimal leh pawl hrang hrangin an entir a. Mizo hnam lam, mal zai leh zaipawl, beat group, lengkhawm zai, costume parade, darbu zaipawl, mizo indigenous games leh pawnto te bakah Kut hmangtuten chhawng an hnawt bawk. Mizo hnam lam an entir zingah vapual lam, salu lam, sarlamkai, chai, parlam, rallu lam, siktuithiang lam leh cheraw kanpui te a tel a ni. 

Chapchar Kut 2017 lawmna hi kawng hrang hrangin kalpui a ni a. Sawrkarin thuchhuah siamin sawrkar hnathawk zawng zawngte chu March ni 1 leh ni 2-ah Mizo hnam incheia inchei tura hriattir an nih angin sawrkar hnathawk ten an zawm tha hle a. Kut Pa Mizoram Chief Minister Pu Lal Thanhawla’n Chapchar Kut puala buatsaih souvenir a tlangzarh bawk. Kut denchhenin Art Exhibition, Museum Exhibition, Photo Exhibition leh Flower Show  buatsaih niin AR Lammual Basketball ground-ah Food Fest leh Handloom Show-te buatsaih a ni bawk. Chapchar Kut chhim tur hian Myanmar, Bangladesh, Tripura, Manipur leh Meghalaya atangin zohnahthlakte an lokal a ni.