Mizorama super specialist rual fuankhawm vawikhatna North East Chapter of Indian Association of Pediatric Surgeons (NEIAPSCON) Conference vawi 14-na chu zanin khan Aijal Club-ah Health Minister Pu Lal Thanzara’n a hawng.

Health Minister chuan India hmarchhak pum huap Pediatric Surgeon intelkhawmna pawl pawimawh takin kum tina an hman thin inkhawmpui nghah nan Mizoram an thlang chu a lawmawm takzet a ni, a ti a. Mihring nunna chhan thei khawpa mithiam rual kalkhawmte chu an mawhphurhna sanzia hria a khawngaihna, dawhtheihna leh inpekna thar nen an hna thawk chhunzawm turin a fuih a ni. Pu Lal Thanzara chuan hmarchhak biala chengte zingah sum harsatna avangin inenkawlna tha dawng phalo tam tak an awm a, he conference an hman mek hian Mizoram leh India ram hmun danga doctor thiamten inzawmna leh thawhhona tha zawk hring chhuak a, damlote tana zau zawka malsawmna an nih theihna kawng hawng se a duh thu a sawi bawk.

Khuallian Health Minister Pu Lal Thanzara hian NEIAPSCON vawi 14-na puala buatsaih souvenir a tlangzarh bawk a ni.

NEIAPSCON hi zaninah bul tanin March ni 4 thleng an neih chhunzawm dawn a. State pawn atangin pediatric surgeon sawmpanga lokalin Indian Pediatric Surgeons Association aiawh mi pahnih an tel a ni. Naktukah nilengin Aizawl Civil Hospital-ah thupui thlanbik hmangin seminar an buatsaih ang a, March ni 4 ah Live Surgery (Operation Live Telecast) an nei ang.

Hawnna inkhawm hi Organizing Chairman Dr Saia Chenkual chuan a kaihruai a, North East Chapter Secretary Dr.R Kikon, Nagaland chuan report pe in Director Hospital & Medical Education leh National Health Mission Managing Director ni bawk Dr. K.Lalbiakzuala'n thu a sawi a. Mizorama free clinic buatsaih thin Kolkata Bhagirathi Neotia Woman and Child Care Center Dr. Sharon Ishika Ghose leh Dr. Toijam Soni Lyngdoh, Downtown Hospital, Shillong te chawimawina hun an hmang bawk a ni.