Finance Minister Pu Lalsawta'n vawiin khan Central Agriculture University College of Veterinary Sciences & Animal Husbandry, Selesih a tlawh.
Finance Minister chuan Mizoramah ranvulha eizawng tam tak an awm avangin Veterinary Sciences thiamna ramin a mamawh takzet a, Mizoram sawrkar hmalakna thar New Economic Development Policy (NEDP) ah pawh Vety hian hmun pawimawh tak a luah a ni, a ti. Mizote chuan hmanlai atanga kan chin than chuktuah huan siam, vawkvulh, ar vulh leh ran vulh dang reng reng pawh hralh suma chantir lovin mahni intodelhna tawk kan thar chhuak thin a, vawiin thlenga kan la chhunzawm he kan chin dan phung hi thlakthleng a, hlawk tham law law tura hma kan lak a hun tawh a ni, Pu Lalsawta chuan a ti. NEDP chungchang sawi zauin Pu Lalsawta chuan lehkhathiam leh taima te tan hlawhtlinna kawng sawrkarin a hawng a, AH&Vety mithiamte pawhin an hman tangkai a beisei thu a sawi bawk.
Chapchar Kut lawmna hun Vety College Auditorium-a neihah khuallian niin Minister Pu Lalsawta chuan Mizote Kut zinga pawimawh leh mi hriathlawh ber kum dang aia uar zawka Chapchar Kut Mizoramah kan hmang chu lawmawm a tih thu sawiin Mizo ten mahni hnam zahpui lova chawi lar nachang kan hria chu hnam changkang leh hmasawn zia a ni, a ti a. Mizo nun ze mawi tlawmngaihna, aia upa zahthiam leh taimakna vawng nungtu nih tum turin zirlai leh zirtirtu kalkhawmte a chah a ni.
VeterinarySciences & Animal HusbandryCollege, Selesih hi kum 1997 ah ding tanin BVSc, MVSc leh PhD thlengin a zir theih a. BVSc ah Department 17 neiin first year ah seat 76 a awm a, seat 14 hi Mizoram tana dah a ni. MVSc ah zirlai 60, BVSc ah zirlai 257, PhD zirna department pariatah zirlai pahnih zel an nei bawk. He college ah hian cheng vaibelchhe 30 man hu zet project thawh lai 44 an nei a, mithiamten zirbingna an kalpui reng bawk a ni.
Finance Minister Pu Lalsawta hian a duh apiang tana hman theih tur web kiosk a hawng nghal a. Web kiosk hi Agriculture Technology Information Centre building ah dah niin agriculture, horticulture leh veterinary & animal husbandry kaihhnawiha eizawngte leh a duh apiangin a thlawnin an hmang thei a. Lo neih dan, thlai chin hun, ran vulh dan, ran leh thlai enkawl dan leh hriat tur pawimawh dang te a awm a ni.
