Ni 13.11.2015 tlai khan MLA Pu Lalrinliana Sailo an Model Village atan a thlan Chawngtlai khua a hmalak dan tur ngaihtuahin Champhai DC Pu Vanlalngaihsaka hovin Chawngtlai khawtlang hruaitute leh mipuite bakah line department-te an thukhawm.

DC chuan Chawngtlai chu Model Village a thlan an nih angin khaw dang tan entawntlak an la nih ngei a beisei thu leh, chumi atana sorkar hmalak sakna nghak mai lova thahnemngai taka an khaw hmasanna atan thawk zel turin kalkhawmte chu a sawm a ni.

Meeting kaihruaitu Pu CC Lalchuangkima, Project Director, DRDA chuan Model Village a Chawngtlai khua thlangtu MLA Pu Lalrinliana Sailo an a bika hmalakna tur a thlanchhuah point 10 chu chhiar chhuakin, a kaihhnawih department a thawktu te leh VC bakah khawtlang mipuiten an dinhmun leh hmalak tawhna te an sawi a.

Naupang zawng zawng hri danna pek tur tih chu 100% pek thin a nih thu report pek a ni a. Chawngtlai chu pi pute sulhnu pawimawh awmna hmun a nih angin "preservation of historical heritage" hnuaia hmalakna chu uluk taka zirchian a kalpui a tul thu sawi a ni. Zirna lama hmalakna te, tui lakna leh thianghlimna chungchangte leh kawng siam chungchangah te mawhphurtu department theuh ten tha takin kalpui zelin, model village-te chu ngaihpawimawh hmasak bik an nih zel thu an sawi a ni.

Meeting-ah hian Khawzawl BDO, SE PHED, SDHO Khawzawl, DIPRO Champhai-te bakah Chawngtlai khuaa sorkar office hnathawkte an tel bawk a ni.

Sorkar laipuia MP ten ram hmasawnna atan SAGY hnuaia Model Village an thlan theuh zulzuiin tuna Mizoram MLA-ten Model Village an thlan te hi enkawl tur a ni a. He inkaihhruaina hnuaiah hian Model Village tan hian a hranpa a sum dah engmah a awm lo a; Sorkar hmalakna kal mek atangin Model Village-te hi thuam tur niin, nunphung leh rilru put hmanga changkanna thlen te, faina leh thianghlimna ngaih pawimawh inzirtir te chu he hmalakna in a tum zing ami a ni.