837/2023-2024
17.06.2023 : Samagra Shiksha Hnahthial District buatsaihin vawiin khan Cherhlun Community hall ah Community Mobilization on Quality Education leh Career Guidance programme hman niin bialtu MLA leh Higher & Technical Education Minister Dr.R.Lalthangliana chuan khuallian niin a hmanpui a, Khua 5 - CHerhlun, Thingsai, Bualpui 'H', Ngharchhip leh New Ngharchhip atanga HSLC leh HSSLC pass tharte hnenah lawmpuina a hlan nghal a ni.
Khuallian Dr.R.Lalthangliana chuan Covid-19 vangin khawvelah mi Nuai 70 velin nunna an chan thu sawiin Khawvel ram hausa leh changkangte pawhin an mangan pui hle a, Mizoram-ah pawh kum 2 leh thla 3 vel hnathawk hlei thei lovin Covid hrileng hian a tih buai thu sawiin Vawk pul hrileng vanga harsatna te leh Raltlan buaipui a ngaih thu te a sawi a, "heti chunga hmasawnna hnathawh hrang hrang hmuh theihin a awm hi a lawmawm hle a ni" tiin Cherhlun Damdawi In-ah Doctor tha tak dah thuai tum a nih thu leh an Badminton Court-ah carpet a phah sak dawn thu a sawi bakah Chief Medical Officer Hnahthial Office tur pawh sak peihfel thawkhat a nih thu leh District Hospital Hnahthial sak nan Cheng Nuai 1700 sanction tawh a nih thu a sawi bawk a ni.
Mizoram chuan Indo Myanmar border Kilometre 404 leh Indo Bangla border Kilometre 318 a thui a neih thu leh Sorkar laipui pawhin a ngaih pawimawh thu sawiin Commerce & Industries Minister Dr.R.Lalthangliana chuan Myanmar nena insumdawn tawnna tur border haat/trade kalpui tura hmalakna chu Myanmar lamin political boruak danglam an la neih mek avangin duh angin hmalakna a chak theih loh thu leh pawi a tih thu a sawi a, "Tiau panna kawng laih tlang a ni a, Rawnal kawng pawh laihchhuah tep ni tawhin Bualpui atangin Saisihchhuah panna kawng pawh KM 15 Blacktop zawh tawh niin Sangau tlangdung pawh pheina turin hma kan la tan leh dawn'" tiin hun rei tak a buaipui tawh Tuipui 'D' a Lei dawhna tur Cheng Nuai 9200 tih fel a nih tawh thu leh Compensation tur Cheng Nuai 700 vel pawhin Hnahthial DC Office a thlen tawh thu a sawi bawk a ni.
Zirlaite chu tih tak takna nen lehkha zir tura chahin H&TE Minister Dr.Thangtea chuan "certificate tha tak dawnna tur ni ringawt lovin chhawr tlak thiamna kan neih a ngai a, he tlang dung atang hian ram tan mi hlu leh chhawr tlak kan nithei tih hriaiin in inbuatsaih ka duh a ni" tiin Hlawhtlinna kawngah ruihhlo a leng lo tih a sawi a, "kan tih tur atana pawimawh ber pakhat chu hriselna ngaih pawimawh niin hausa viau pawh ni ila kan hrisel loh a, kan daihrei lo chuan awmzia a awm lo. Kan taksa hriselna ti chhe thei thil hrang hrang lakah kan fihlim a tul a ni" a ti.
He hun hi Pu Micky R.Lalenkawla DEO/DPC Hnahthial chuan kaihruaiin zirtirtute zingah naupang zirtirna tuipui tak tak lo, phurrit a la an awm thin chu tha lo a tih thu a sawi a, intihsiakna ah tel thei leh tel ngam thin turin a fuih a ni. Pu Lalhruaitluanga ZoCareers chuan zirlaite hmalam hun atana hriat tur tul leh pawimawh hrang hrang a zirtir bawk a ni
Attachment
- Loading attachment...
