1214/2022-2023
Aizawl, 12th July, 2022 : Vawiin khan Chess Olympiad puala Torch Relay (meichher) hmasa ber neih mekin Mizoram a rawn thleng a, hemi pual hian Lengpui Community Hall-ah inkhawm buatsaih niin, Sports & Youth Services Minister Pu Robert Romawia Royte chuan khuallian niin a hmanpui.

He Torch Relay hi June ni 19, 2022 atanga July ni 28, 2022 thleng neih tur a ni a. 44th Chess Olympiad (July 28, 2022 - August 10, 2022), Chennai, India a neih tur puala buatsaih a ni. He meichher hian ni 40 chhungin India ram khawpui hrang hrang 75 a tlawh hnuah July ni 28, 2022 hian Chess Olympiad neihna hmun tur Chennai khawpui a lut ang a, inelna tan nghal a ni ang.

Torch Relay puala inkhawm buatsaihah thu sawiin khuallian Pu Robert Romawia Royte chuan khawvel pum huap infiamna puala buatsaih meichherin Mizoram a rawn thleng hi thil ropui tak a ni a, ni chhinchhiahtlak a ni, a ti a. Chess chu infiamna upa leh zahawm tak a nih avangin a hlu hle a ni, a ti bawk. Chess chu game hautak lo tak a nih rualin thluak sawizawina tha tak a ni a ti a, thluak hman ngai tak a nih avangin chess thiam tur chuan ngaihtuahna fim hman theih a tul a, ruihtheih thila insum a ngai hle tih sawiin, zirlaite leh thalaite phei chuan uar se a duh thu a sawi a ni.

Pu Roberta chuan chess that zia hi khawvelin a hriat avangin a ngaihlu a, rilru hrisel neihna atan mai bakah thluak tih chakna atana pawimawh tak a ni a, Torch Relay leh Grandmaster Mitrabha Guha rawn kal hian Zoram mipuite thinlungah chess hlutna tuh nghetin, chona thar leh phurna pe ngei se a duh thu a sawi bawk a ni.

Agriculture Development Board Vice Chairman Pu H. Biakzaua, MLA, Youth Affairs and Tourism Board Vice-Chairman Pu TC Pachhunga leh Mizoram State Sports Council (MSSC) Secretary Pu John Tanpuia, MCS bakah MSSC hnuaia Association hrang hrang aiawhte, Mizoram Olympics Association aiawhte, USAM aiawhte, Sports & Youth Services Department officialte bakah College leh School thlanchhuah hrang hrang atangin zirlaite he hunah hian an tel a ni.

He hun hi Pu Joseph H. Lalramsanga, MCS, Director, Sports & Youth Services Department-in a kaihruai a, Mizoram Chess Association President Dr Lalhmuchhuaka'n thu a sawi a, Grandmaster Mitrabha Guha-in khuallian hnenah Olympiad Torch (meichher) a hlan hnuah inkhawm tan niin, he inkhawmah hian Grandmaster hian Mizoram Chess Association in chess player a thlanchhuante a rualin a inkhelhpui a, programme zawh hian khuallian chuan meichher hi Grandmaster hnenah hlan let lehin vawiin chawhnu dar 1:45 khan Lengpui Airport panin an kir a, Arunachal Pradesh a pan leh dawn a ni.