1213/2022-2023
Mamit 12th July, 2022 : Nimin khan Kawrtethawveng khuaah Pi R. Lalrodingi, Adviser, NEC & Nodal Officer for Vibrant Villages of Mizoram chuan khaw thlan bik khaw - 13 atanga VCP-te inkawmhona hun a neihpui a, he hun hi Pu Ngulzathuama, MCS, SDO (Civil) Kawrthah, BDO, Zawlnuam ni bawk chuan a kaihruai.

Pi R. Lalrodingi chuan Vibrant village chu Central Sorkar hmalakna a nih thu tarlangin, border area-a cheng mipuite harsatna ataka hmuhpui tura tirh anih thu a sawi a. He vibrant village programme-in a duh angin zan khat tal border area riahchilh a, mipuite khawsakphung dik tak zir chiang tura kal a nih thu leh a tul anga report leh rawtna NITI Aayog a pek tur a nih thu a sawi a. Vibrant Village-in a tum leh kalphung turte hrilhfiahna a neih bakah Vibrant village atana thlan VCP te'n an khaw dinhmun hrang hrang, Zirna lam, Hriselna lam, Inkalpawhna leh Inbiakpawhna lam te, Tui thianghlim leh Electric an dawn dante leh a mihring chengte eizawnna tlangpui sawina hun an nei theuh bawk.

He hunah hian Vibrant Village atana thlante harsatna hrang hrang sawi niin, an harsatna sutkian dan tur leh hmalak dan tur inkawhhmuhna neih nghal a ni a. Pi R. Lalrodingi chuan mipui hmasawnna tura Sorkar scheme hrang hrangte lo zirchiang a, a nih dan tura kalpui a ni em tih lo chik lehzual theuh turin VCP te hi a chah nghal bawk a ni.

Pi C. Lalnunsiami, Sr. Research Officer, Planning & Programme Implementation Department, Govt. of Mizoram pawhin tun Sorkarin scheme hrang hrang a kalpui mekte sawifiahna neiin khawtlang hruaitu VCP te chu an mawhphurhna hrang hrang hrilhfiahna hun a nei nghal bawk a ni.