Laipuitlang leh Ramhlun Venglai chhiatna rapthlak avanga chhanchhuah hna leh a hmunhma senghawi hnatlang chu a ni 4 na atan vawiin khan ngawrh taka chhunzawm zel a la ni a. Ruang zawn hna hi Disaster Response Force ten ngawrh taka chhunzawmin vawiin chhun dar 12:30 vel khan Lalremchhungi d/o H.Lungmuana (L), Thingfal ruang lakchhuah a ni. Vawiin tlai dar 4 thlenga thu dawn dan chuan Vanlalrema Hnamte s/o Liankhuma, S. Lungpher ruang pawh hi hmuh tawh niin haichhuah tuma beih mek a ni.

Vawiin chuan chhiat tawhna hmunhma senghawi tura CYMA in a bulhnai YMA branch a ruat Ramhlun North; Ramhlun South; Ramhlun Venglai, Ramhlun Vengthar, Ramhlun Sports Complex; Chaltlang; Chaltlang North; Bawngkawn; Bawngkawn Chhimveng bakah Laipuitlang branch te an hnatlang a ni. Chhiattawk puala vehbur khawnah pawh thahnem tak luh belh zelin Laipuitlang leh Ramhlun Venglaia dahkhawmna hmunah te hian mimal, Kohhran, pawl ho leh mi thahnemngai thawhkhawm zawng zawng chuan Rs. nuai 14 chuang a tling tawh a ni.

Chhiat tawhna hmuna chetlak dan thlithlai hian Mizoram sorkar mipawimawh engemaw zatin an thutchilh reng a, vawiinah chuan Speaker Pu R. Romawia, Home Minister Pu R. Lalzirliana, Finance Minister Pu H. Liansailova, Revenue Minister Pu J.H. Rothuama, Transport Minister Pu P C Zoram Sangliana, DM & R Minister Pu Nihar Kanti Chakma bakah Parliamentary Secretary engemaw zat leh MLA te an tel a ni.

Chhiat tawhna hmun vawiina thutchilhtu Parliamentary Secretary to Chief Minister Pu Lal Thanzara chuan he vanduaina rapthlak tak avanga Disaster Response Force tha thawh te, Assam Rifles hnathawh te, CYMA bultuma YMA branch hrang hrang chatlak na zawng zawngte chu ropui a tih thu leh vanduaina tawkte tana an neih sum phal taka petu Kohhran, pawl ho leh mimal zawng zawngte chungah lawmthu a sawi a ni.

Hetih lai hian Assam Rifles DIG Brig. GAV Reddy, SC chuan Mizoram Chief Minister hnenah thu thawnin chhanchhuah leh senghawi hnathawk tur hian Assam Rifles mite englai pawha an in rin reng thu leh hna pawh an thawh chhunzawm ve zel thu a hrilh a. Assam Rifles mite inpekna leh inhuamna zawng zawngah hian Chief Minister chuan lawmthu a hrilh let nghal a ni.

Vawiina chhanchhuahna leh senghawi hnathawktute ei leh in hi SAY Central Corp ten an buatsaih a ni.