Chief Minister sawmna anga Mizoram chhunga NLCPR leh NEC hnuaia hmalakna hrang hrang a hmuna enfiah tura lokal UK Sangma, Secretary DoNER chuan vawiin khan NLCPR leh NEC hnuaia hnathawh nei mek Department hotute Secretariat Conference Hall-ah kawmin thil pawimawh chi hrang hrang an sawiho a ni. Inkawmhona ah hian Mizoram Planning Board Member Secretary pahnih Pu Haukhum Hauzel IAS (Retd.) leh Pu PL Thanga IAS (Retd.) te pawh an tel.

Pu UK Sangma chuan Hmarchhak biala hmasawnna hna hrang hrang khawih tura din DoNER Ministry hian Project endiktu tur Technical Clearance Agency atan WAPCOS nen thawhhona thuthlung an siam thuai dawn a, hei hi tihpuitlin a nih hunah chuan NLCPR hnuaia hmasawnna hnathawh tur te chu chak leh rang zawka tihfel zung zung a ni thei tawh dawn a ni, a ti. NLCPR Project Sanction chungchanga state sorkar nena inbiak rawnna awm lova project sum an lo paih then thin te, a kim lova an sanction thin te tihbo nan state sorkar leh DoNER Ministry inberawna sanction thin anih tur thu Union Secretary hian a sawi a. Mizorama Medical College dinna tur leh cancer enkawlna tura rawtna chungchangah Pu UK Sangma hian a theih dan ang angin Ministry of DoNER-in tanpui an tum tur thu a sawi bawk.

Meeting-ah hian DoNER Ministry-in sanction a tih muangchan avanga hmalak a harsatna leh thil man sang zelin a nghawng te, Ministry hrang hrang project endiktu atana DoNER-in a hman te atanga harsatna hrang hrang awm thin te, state sorkar-a department ten Utilization Certificate (UC) an thehluh tlai avang te, report a hun taka department ten an thehluh loh avanga sum pekchhuah tlai te sawiho a ni a. Sum tam zawk pekchhuah daltu tibo turin state sorkar department tin ten May 2013 chhungin UC thehluh tur awm zawng zawng thehlut vek tura tih an ni a. Project zawh fel theih ho te thlirin project engemawzat March 2014 chhunga zawhfel a nih tur thu meeting-ah hian sawi lan a ni bawk.

Tun dinhmunah, Mizoramah NLCPR Project thawh zawh tawh 68 awmin, thawh lai mek Project 59 a awm a. Heng atan hian NLCPR sum cheng nuai 54,839.69 hman phalsak niin cheng nuai 29,517.25 chu pek chhuah tawh a ni. 2012-2013 chhung khan a pumpuiin Project thawh nan cheng nuai 8168.12 chu pek chhuah hman a ni a, DPR thehluh tawh ngaihtuah mek 44 a awm a ni. NEC hnuai bikah chuan Project thawh lai mek 60 a awm a, heng atan hian NEC chuan cheng nuai 79,279.87 a pawm tawh a ni.

Vawiin vek hian Union Secretary hian Khatla a AH&Vety Polyclinic sak mek te, Khatla a Post Matric Student Hostel sak mek te, Pitarte tlanga Hawla Indoor Stadium te leh Mualpui a Rajiv Gandhi Stadium te a tlawh a. DoNER Secretary hian state hmalakna tha thawkhat viaua a hriat thu sawiin a rang thei ang bera project te zo fel turin state sorkar a ngen a ni.