Vawiin chhun dar 12:00 khan Chhiahtlang Higher Secondary School chuan 2019 HSSLC Result tha tak an neih lawman hun an hmang a, bialtu MLA Er. Lalrinawma, Dy. Speaker chuan khuallian niin a hmanpui.

Khuallian chuan zirlai naupangte leh zirtirtute thawhrimna rah atak hmuh tur awm thin chu lawmawm a tih thu a sawi a. Zirlai pass hrim hrim hi a hlu em em a ni, a ti. Zirlaite chu an tuma chiang tura chahin, taihmakna nen tihtakzeta hmalam pan zel turin a chah a. Zirna sang zawk zir tura hmun danga an kal hunah pawh mahni indah hniam bikna nei lovin, chapo si lovin taima taka zir zel turin a chah a, mi taima tan tluk loh tur bik tumah an awm lo a ni, a ti. An school dinhmun pawh a hriatsak thu sawiin, hei aia dinhmun tha zawka an awm theihna tur ngaihtuahpui reng an nih thu a sawi bawk.

Chhiahtlang Higher Secondary School hi khawtlang tangrualin kum 2014 a an din a ni a, kum 2018 Lumpsum Aided dinhmuna hlankai an ni. A din kum atang hian HSSLC exam an hmachhawn nghal a, hemi kum hian naupang 1 in hlawhtlinna a chang zo ve ta lova. Hemi hnu atanga kum 2019 thleng, tum 5 exam an hmachhawn tawh ah zirlai zawng zawng ten hlawhtlinna an la chang vek a ni. Kumin hian HSSLC exam hmachhawn zirlai 10 an nei a, Distinction ah 2, Fisrt Division ah 4, Second Division ah 3 leh Third Division ah 1 an pass a, tunah subject 3 zir theih niin, zirtirtu 5 an awm mek a ni.

Pi Lalawmpuii Ralte, Principal chuan khawtlang hruaitute thatna leh inpekna avanga hetiang dinhmun thleng thei annih thu a sawi a. Managing Board Commiitte pawhin theihtawpa an chhawmdawl thin avangin lawmthu a sawi bawk a ni.

He hun hi Pu CR Dothanga, Chairman, Managing Board Committee leh VCP Chhiahtlang chuan a kaihruai a, HSSLC pass chhuak tate leh an nu leh pate bakah Managing Board Committee Memberte leh khawtlang hruaitute an tel a, Pu K. Lalchhandam, Lecturer chuan lawmthu sawina hun hmangin, tlaiah ruai thehin HSSLC result tha an neih chu an lawm a ni.