Vawiin Chawhma dar 10:00 khan Directorate of School Education  buatsaihin Convention Centre, Lunglei ah Primary leh Middle School Head Master te pualin intuaitharna hun One Day Refresher Programme for Elementary School Head Masters neih ani. Pu Lalchhandama Ralte, Education Minister chu khuallian niin Pu Lalrinsanga Ralte, Serlui bialtu MLA chu khualzahawm ani.

Minister chuan, Mizoram sawrkar department zinga lian ber leh thawktu ngah ber Education Deparment hi sawrkarin a ngaipawimawh hle a, zirna lama hma kan sawn zel theih nan budget pawh dah tam a ni, a ti.  Kan rama zirna in ah te sawrkar school aia mimal leh kohhran enkawla zirlai an tam zawk tlat mai leh result pawh an nei tha zawk fo thin chu ngaituah chian a tul hle a ngaih thu a sawi a. Sawrkar schoola zirtirtuten kan puanven te sawi chhing a kan intuaithar a tul a ni, a ti a. An zahawmna vawnghim a, hun vawng dik tur leh zirlaite tan an thiamna leh theihna hmang chhuak thar leh turin a chah a ni. Minister hian kum 7 lai lo kalpui tawh  Continuous and Comprehensive Evaluation (CCE) sawrkarin ennawn a tiam ang ngeia an ennawn mek thu sawiin, exam kalphung pangngaia let leh a school calender pawh tihdanglam anih tur thu a sawi a ni. Kan rama zirnain hniam lam a pan chhan ni a lang pakhat zirtirtu indaihlohna pawh  hnawhkhat turin sawrkarin hma a la mek a ni, a ti. Zirnain hma a sawn lehzualna tur atan tunhma lama kalpui thin tawh School Inspection pawh kalpui thar anih tur thu a sawi bawk. Education Dept,leh zirtirtu te ngaihlut an hlawh lo tial tial hi Head Master leh zirtir tu ten an enchian a ngaih thu a saw.

Sawrkarin zirtirtu tha tak a lak sak a, a thlawn a zirlaibu, uniform leh chaw chhun a pe chung pawha Mizoram puma zirlai zaa 60 ten private school an la thlang zawk tlat hi zirtirtute kan inenfiah a tul nia a hriat thu a tarlang a, zirtirtute lakah sawrkar thikthu a chhe dawn a ni, tiin zirtirtu kalkhawm te theihtawp chhuah turin a fuih a ni.  Tin, Minister hian zirtirtu kalkhawmte chu zirlai piah lamah zirlai naupangte chu Mizo hnam nunphung, tlawmngaihna, aia upa zahna te zirtir tel thin turin a chah bawk. .

He hunah hian Pu Lalrinsanga Ralte, Serlui Bialtu MLA pawhin thusawiin ramin eizawnna leh zirna kawngah hma sawn zelna atana pawimawh, zirlai naupangten thiamna leh  eizawna tura mahni inrintawkna an neih theih nan zirtirtute chu tihtakzet leh inpekna thar nen a zirtir hna thawk thar theuhin turin a chah bawk.

 Pi Esther Lalruatkimi, IRS,Commissioner & Secretary, School Eductaion Department pawh in Head Master te mawhphurna, aikal lak phal ani loh thu sawi bakah Schhool timing thar vawndik, naupang te tan roll model ni thurin a duh a, rilru thar, thinlung thar pu chunga hna thawk theuh turin Head Master kalkhawm te a chah ani.  Pi Lalzarmawii IAS, Director of School Education in lawmthu sawina hun a hmang bawk.