“MP Model Village” SAGY Programme kalpui mekah State Istitute of Rural Development (SIRD) buatsaihin Rajya Sabha MP PU Ronald Sapa Tlau-in Model Village a siam tura a thlan Chhiahtlang khaw hruaitute tana ni 5 chhung awh tur “Training on Participatory Planning” chu vawiin chawhnu dar 1:30 khan Chhiahtlang Community Centre ah Pu Andrew H Lalremruata, MIS, DIPRO, Serchhip chuan a hawng a, Chhiahtlang khawtlang aiawh tlawmngai pawl hrang hrang hruaitute, Village Council member te leh Bharat Nirman Volunteer (BNV) thahnem tak an tel a ni.

Training hawngtu Pu Andrew H Lalremruata chuan kalkhawmte chu Model Village awmzia hrilhfiahin tunah hian “Model Village” an la nil ova, “Model Village”, khaw dangte tana entawn tlak ni tura chher an la nih dawn chauh thu sawiin hmabak tam tak a la awm thu leh thawhrimna leh khawtlang inlungrualna nen lo chuan khaw dangte tana entawn tlaka inchherchhuah a har tur thu a sawi a, thawhhona tha nei turin a chah a ni. Chhiahtlang khawchhung huap tualto chanchinbu pakhatmah a awmlo chu a vei thu sawiin, model village ni tur chuan mipuiten hriatna zau an neih a tul a, Aizawl atang chanchinbu nitin hmu mahse anmahni khawtual chhung chanchin a inziah ngai mang loh thu leh mahni tualchhung chanchin hre mumal si lova pawnlam thuthar hre bel hle ringawt nih chu hmasawnna khingbai tak anih thu sawiin tualto chanchinbu pakhat tal nei tura tan la turin khawtlang hruaitu kalkhawmte chu a fuih a, an khaw Development Plan Sawrkar Department hrang hrang hotute nen an siam hunah pawh timna leh venthawn nei lova huaisen taka an khawtlang hmasawnna tur ni a an hriat auchhuahpui tura hrilhin a tihhlawhtlin theih chi anih leh nih loh pawh chiang takin a hriat fiah thei zawk dawn a, a hnu a in puhmawhna leh vuivaina lo thleng thei pumpelhna tha tak ani dawn a ni a ti bawk.

Training hi ni 5 chhung awh tura duan niin SAGY thiltum leh nihphung te, programme kalpui dan tur te bakah pawl hrang hrang leh Department hrang hrangte, khawtlang mipuite leh khawtlang hruaitute hnathawh tur chanvo leh mawhphurhna te chiang taka inzirtir a ni ang a, tunlai thiamna hmanga hnathawh dan chi hrang hrangte, Village Development Plan siam dan tur te leh Practical training chi hrang hrangte inzirtir niin February ni 27, 2015 thleng kalpui a ni ang. Vawiin Training hawn inkhawm hi Pi Rohnuni Colney, APO(W), DRDA, Serchhip in a kaihruai a, Pu Khawlsiamthanga Khawlhring, Deputy Director, SIRD, Course Director ni bawk chuan Training kalpui dan tur kalphung sawifiahna hun a hmang a, Dr. Lalhruaitluangi Sailo, Core Faculty, SIRD in zirtirna a pe a ni.

Training ah hian Chhiahtlang khawchhunga YMA Branch 5, MHIP Branch 2, MUP Unit 2 aiawhte bakah Village Council member te leh Bharat Nirman Volunteer (BNV) thahnemtak an tel a ni.