54/2026-2027

Aizawl, the 7th April, 2026: Mizoram Larsap, General (Dr) Vijay Kumar Singh, PVSM, AVSM, YSM (Retd) chu vawiin chawhma khan Lok Bhavan, Aizawlah Chhiarpui, Census of India 2027 Phase-I (Houselisting leh Housing Census) hnuaia self-enumeration-ah hlawhtling takin a inziaklut.

Larsap General (Dr) Vijay Kumar Singh chuan India rama digital census hmasa ber kalpui chhoh mek a ni chu lawmawm a tih thu sawiin, Mizoramah pawh he hmalakna hi hlawhtling taka neih anih ngei theih nana theihtawp chhuah turin thawktu zawng zawngte a chah a. Mipuite pawh he hmalakna lian tak hi ngaipawimawha, chhiarpuia inziaklut theuh tur leh official-te tha taka tawiawm turin a sawm a. Thingtlang kilkhawr bera chengte thlenga hmaih awm lo tura fimkhur tur leh, mipuite'n harsatna an tawh loh nana a awlsam thei ang bera chhiarpui kalpui turte, hriat thiam loh a awm loh nana tan la sauh sauh turin a fuih bawk.

Larsap chuan Mizo khawtlang nunan midang tanpuina duhna a beh ngheh tlat thu sawiin, chhiarpui buaipuitute chu an hnathawh a lo awlsam zawk theih nan Village Council leh Local Council-te nena thawhdunna ngai pawimawh turin a chah a. Mizoramah chhiarpui tluang leh tha thei ang bera kalpui anih theih nana theihtawp chhuah tura chahin duhsakna a hlan a ni.

He hunah hian Directorate of Census Operations official - Pu Vinod P. Kavle, Director of Census Operations, Pu Joseph H. Lalramsanga, Municipal Commissioner cum Principal Census Officer, Pi Irene Zohlimpuii Chongthu, Addl. Secy, GAD & Addl. State Nodal Officer, Pu Shivam Gupta, Asst. Director of Census Operations leh Pu Sandip Panja, Asst. Director of Census Operations te'n Larsap hnenah hian Mizorama census kalpui dan tura ruahmanna an siamte, hmalak tawh dan leh hmachhawpte an hrilh fiah a ni.

Chhiarpui 2027 hi India rama digital census hmasa ber tur niin, thawh hniha kalpui tur a ni a. Thawh khatna Houselisting leh Housing Census hi April 1, 2026 atang khan kalpui tan a lo ni tawh a. Thawh hnihna Population Enumeration hi February 2027-ah neih tan tur a ni a. Self-Enumeration hun hi April 1 atanga April 15, 2026 thleng a ni a, April 16 atanga May 15, 2026 thleng House Listing leh Housing Census Mizoram pumpui-ah kalpui a ni ang.