55/2026-2027

Lawngtlai, 7th April 2026: Vawiin khan 'Lawngtlai District Vigilance Commitee on Fertilizer' chuan an Chairman leh Bawrhsap nibawk Pu Donny Lalruatsanga kaihruaiin a Office Chamber-thutkhawm an nei.

Pu Donny Lalruatsanga chuan kuthnathawk a bik takin Lo/ Huan/Leipui siamtuten tha zawka thlai an thar theih nan lei tha pekchhuah chu thil pawimawh tak a ni, a ti a. A bik takin Kharif Season ( Monsoon) thlai chi thlak a hun leh mai dawna, Lawngtlai District- in a mamawh zat pek theih tura hmalak a nih thu tarlangin, Mizoram sawrkarah pawh mamawh ang ang thleng a nih tawh thu sawiin, a mawhphurtute theihtawp chhuah turin a chah a. Ei leh bara Lawngtlai District - in khamkhawp a thar theihna turin Lo/ Huan neitute an pawimawh hle tih sawiin, thahnem ngai taka thawk turin a fuih a ni. District pawn lam atanga thlai thar la lut lo a, mahni intodelh tura tan lak a tul thu tarlangin, thlai chinna hmun tihzau pawh a tul hle tih sawiin, Agriculture leh Horticulture department (Mizoram leh LADC) leh Lo/Leipui neitute theihtawp chhuah turin a chah nghal bawk.

Pu PC Lalchunglura chuan Lei tha lei hralh kawngah fimkhur a ngai a, a mamawhtute tan lei tur a awm reng a pawimawh hle a ni, a ti. Lo neituten khamkhawp an thar bakah mipuite hnena hralh tur an neih theih nan Committee - in theihtawp a chhuah reng thu a sawi a. Thlai thar leh hralh kawngah intodelh turin hmalak chhunzawm zel a ni ang a ti a ni.

Pu Caleb Vanlalrinngama, Member Secretary leh ADAO nibawk chuan Lawngtlai District- a Lei tha mamawh dan tlangpui report pekna a nei a. Tun dinhmunah NPK, Urea, DAP, leh mamawh ang angte state sawrkarah thlen nih tawh thu a sawi a. Fertilizer bikah lo neituten an mamawh ang angte an hmuh theih nan chal zawka hmalak mek a nih thu a tarlang a ni.

Vawiin thutkhawmah hian 23 Assam Rifles, Horticulture Department, Agriculture Department aiawh leh Taxation Department (LADC) te an tel thei a, Pu Donny Lalruatsanga chuan lawmthu sawina neiin hun a khar.