Vawiin khan Disaster Management & Rehabilitation Minister Pu Nihar Kanti Chakma hovin Aizawl DC leh a thawpui te; Department hrang hrang aiawhte (DM&R, PHE, Health &FW, Sports & Youth Services-a Adventure Wing, LAD); Police hotu thenkhat te; CYMA hruaitu te; Laipuitlang leh Ramhlun Venglai Local Council hruaitute leh hemi veng pahnih a YMA Branch hruaitute te’n tunhnaia Aizawl Laipuitlang leh Ramhlun Venglaia chhiatna rapthlak tak thleng chungchanga chanchhuahna hnathawh te an thlirlet. Hetiang chhiatrupna lo thlen thulh leh ah pawh chanchhuah hna thawhna tura thil tangkai leh hmanraw pawimawh deuh deuh te an sawiho bakah hemi chungchanga rawtna tha niawma an hriat te pawh an sawi lang bawk a ni.
Pu Nihar Kanti Chakma chuan tun tum chhiatna laka chanchhuah hna thawktu SDFR te, CYMA leh mi tlawmngai thathawh zawng zawng te chhungah lawmthu a sawi a. Mizo tlawmngaihna, thianchan thih ngam thinlung pu a hnathawh te chu fakin tun hnu zel atan pawh a thlamuanawm zia a sawi lang a ni.
He hun kaihruaitu Disaster Management & Rehabilitation Department-a Principal Secretary Pu PC Lallawmsanga, IPS chuan tun dinhmunah chhanchhuah hna thawk tur train chhuak tawh Police Battallion hrang hranga atangin mi 376 an awm tawh a, tuna training mek mi 45 an la awm thu te, hemi te tan hian hmanraw tha leh tangkai tak tak neih leh lakbelh zel tum a nih thu te, vawiina hetianga inrawnkhawnna hun buatsaih hi thil tul tak anih thu te bakah chhiatrupna thleng thei laka hma latu pawl lian tak khawvel huap Geo Hazards International ho pawhin Aizawla hun an rawn buatsaih tawh thu te leh Aizawl khawpui dinhmun an zirchian mek thu te a sawi a ni.
Thusawitu dang CYMA President Pu T Sangkunga pawhin tunhnaia chhiatna thleng chungchanga thawhhona tha tak avangin lawmthu a sawi a, thlipui hlauhawm takin Mizoram pum a tih thlabar chungchangah Science & Technology Department leh I & PR Department te’n mipui chiai lo tura hma an lak te chu tha a tih thu a sawi a, Aizawl khawpui chhungah hian hmun him lo leh derthawng engemaw zat a la awm nia hriat te chu uluk zawka thlithlai zui reng a tul thu a sawi chhuak bawk.
He hunah hian Laipuitlang leh Ramlun Veng Local Council hruaitu te pawhin thusawina hun an nei a, Mizoram chhung leh pawn, Kohhran hrang hrang te, tlawmngai pawl te leh mipui atanga tanpuina an dawn te chungah lawmthu an sawi a ni. He hunah hian Pastor J. Vanlalhluna chuan hunserh a hmang a, DM &R Director Pu C Lalpeksanga’n lawmthu sawina neiin hun hi a khar a ni.
