Kum 1992, June ni 5-a Brazil khawpui Rio de Janeiro-a UNO ‘EarthSummit’neih tum khan khawvel ram hrang hrang aiawhten May ni 22 hi kumtin ‘International Biological Diversity Day’ atan hman an lo rawt tawh angin vawiin khan ramchhung leh khawvel hmundangte ang bawkin Mizoramah pawh he Ni hi hman a ni a. A lawmna inkhawm lian ber chu Assembly House Annexe Auditorium, Aizawl-ah hman niin Parliamentary Secretary Lt.Col.(Rtd) Z.S. Zuala’n a hmanpui a ni.

Kumin thupui ‘Water & Bio-Diversity’ pawimawhna sawiin Parliamentary Secretary Lt.Col.Z.S. Zuala chuan khawvela thilnung reng reng hi tui tel lova nung thei lo kan nih vek avangin boruak tihbawlhlawh te, ramngaw tih chereu leh leilung khawih chhiat nasa lutuk hi mihringten kan bansan a tul a ni, a ti. Mizoramah pawh Forest Department kutah dah mai lovin, ramngaw enkawl leh humhalh hi kan zavai mawhphurhna a ni tih i hre thar leh theuh ang u tiin kalkhawmte a chah. Hmanlai Mizo lalten ram tikangte chu na taka hremin cheng 40 leh salam an chawi tir thin thu sawiin Col. Zuala chuan tunlai Mizote nunphungah chuan mobile handset to tak tak lei nan sum kan neih laiin tui khawlna tur tuizem siam nan erawh sum kan nei lo hi inenlet kan ngai a ni, a ti bawk. Hmasawnnain a rawn ken tel kawngpui siam te, bawlhhlawh paih dan te leh kan thing leh thlai chin duhdante hi ennawna, boruak leh leilung tichhe lo thei ang bera tanlak kan mamawh a ni, a ti bawk.

Environment & Forests Department PCCF Pu J.L.Singh pawhin thu sawiin Pathian chuan a thilsiam reng rengte hi awmze nei taka a siam an ni a, pakhat a chhiat emaw a mang chuan leilung leh a chhehvel boruak thleng a nghawng thin a ni, a ti. Khawvel siam a nih danah hian kan mamawh tur tawk thil a awm vek a, amaherawhchu kan duhamna phuhruk tum hian mihring ten nasa takin leilung leh boruak kan ti chhiat phah a ni, a ti bawk. Mizoram-ah Sanctuary/National Park 9 - Murlen, Phawngpui, Lengtleng, Tokalo, Ngengpui, Pualreng, Tawi, Thorangtlang leh Khawnlung bakah Dampa Tiger Reserve Forest awm te chu Forest Department-in theihtawpa a enkawl mek thu a sawi a. Mizoram state zau zawng zaa 8% chauh hi forest cover area tak tak a nih thute a sawi a, heng enkawl leh humhalh hna hi mitin te mawhphurna a ni, a ti bawk.

Vawiin Bio-Diversity Day hmannaah hian Pu Liandawla, Chief Wildlife Warden; Dr. Lalnuntluanga, Asst. Professor, Dept. of Environmental Sciences, MZU leh Pu Samuel Lalliansanga, AEO, Agriculture Dept. ten ‘Water/Crop Bio-diversity’ chungchang kalkhawmte an hrilhfiah a. Forest Deparment officers and staff, MZU Department hrang hrang aiawhte leh school zirlai engemawzatin he hunah hian an rawn tel a ni.

Sorkar laipui chuan kum 2002-ah khan Bio-Divesity Act hi a pass tawh a, Mizoramah pawh Mizoram Bio-Diversity Board din a ni tawh a ni.