National Disaster Management Authority (NDMA), New Delhi chuan chhiatrupna rapthlak tak thlen thut pawha pheikhai rual zawka chhanchhuahna hna thawh dan tur ‘Incident Response System (IRS)’ a duan chu vawiin khan Disaster Management & Rehabilitation Department huaihawtin Aizawl Club Conference Hall-ah zirho a ni a. He training-ah hian a kaihnawih department bakah District zawng zawng DC aiawh te, tlawmngai pawl leh kohhran aiawhte an tel a ni.
IRS zirhona hun hi Principal Secretary, DM&R Pu P.C. Lallawmsanga’n a kaihruai a, Mizoram District tinah DM&R Cell din leh Nodal Officer ruat an nih tawh thu a sawi a. Chhiatrupna chu engtiklai, khawi hmun leh tute chungah pawh thleng thei a nih avangin, inven dan kawng hrang hrang awmte chu ngun taka zir a, chhanchhuahna hna thawk thei tura ruahmanna siam tul te chu a theih ang chin chin chu neih a pawimawh a ni, a ti.
NDMA atanga mithiam an rawn tirh Dr. B.B. Gadnayak, IRS Specialist chuan The Disaster Management Act, 2005 leh ‘Incident Response System’ chungchang chipchiar takin kalkhawmte a hrilhfiah a. Kum 1999-a Orissa state Cyclone na takin a nuai leh 2003-a Gujarat state-a lirnghing rapthlak a thlena mihring leh bungrua namen lo hlauh a nih avangin India sorkar chuan he Act hi a duang ta a. Chhiatrupna a thlen pawha chhanchhuahna hna rang leh felfai zawka thawh a nih theih nan IRS hi duan a ni bawk, a ti.
State Project Officer, UNDP Pu Dominic Lalhmangaiha pawhin thu sawiin Mizoramah chuan sorkar department, tlawmngai pawl, kohhran leh mipuite thawhhona tha tak a awm avangin disaster management lamah hmalak pawh a ti awlsam a. Tun hnai khan PWD-in lirnghing na tak thlen thuta in him tawk lo tura ngaih te a hmunah an enfiah thu te, in sak lai reng reng te chu uluk taka enthlakzui leh vil an nih reng thu te pawh a tarlang a ni.
Vawiin meeting-ah hian District hrang hrang Disaster Management Nodal Officer te, tlawmngai pawl leh kohhran aiawha lo kal zawng zawng ten an hmalakna te an sawi a. The Disaster Management Act, 2005 hnuaiah hian sorkar department tin ten “disaster plan” felfai tak siam chu an tih makmawh a nih thu leh he Act hi IPC-in a huam tel thu sawi a ni bawk.
