Transport Minister Pu PC Zoramsangliana’n vawiin khan a bial chhung Kolasib-a NLUP hnuaia Bawng vulh thlangtu mi 27 te hnenah Bawng chi tha ram pawn atanga sawrkarin a lakluh a sem.

NLUP bawng chi tha te hi Thingdawl-a AH& Vety Farm atangin Minister hian a sem a. A sem hma a thu sawiin Pu Zoramsangliana chuan sawrkar siam hma a ‘kan lo sawrkar chuan’ tia kan tihtur kan intuk ang ngeiin hei a takin NLUP chu a dawngtu tura thlante hnenah kan pe ta a. Thenkhat kan thusawi awih duh lo leh nuihzat chana min changtute pawn thutak chu an hmu ta a. Pu Lal Thanhawla sawrkar hian kan thutiam kan ti hlawhtling em, a tak kan chantir em tih hi lo inzawt ula, a nachang hria, hruaitu kan nei hi lawm nachang hriat a hun a ni, a ti a ni.

Pu PC Zoramsangliana chuan, eng sawrkar maha la tih ngai loh mirethei pualin Budget kan dah a. Khua leh tui te an chanvo diktak pek a, eizawnna ngelnghet siamsak hi kan sawrkar chuan kan tum a. Bawng chi tha chah chhuak tur hian aman ato tham avangin a tira sum ruahman pawh kan Chief Minister chuan a tihpun phah hial a. Kan hriat reng tur erawh chu sawrkar atanga kutdawh rilru leh tawp chin nei lo khawpa a thlawn a thil beisei lova, kan tih ve tur taima taka thawha kan thil dawn te innghahna tlaka siam chhoh hi a ni, a ti a. ‘Sekibuhchhuak tha ngai’ tih hi i hre reng ang u, a ti. NLUP chu scheme puitling a nihzia Central pawhin min hriatpuiin min phurpui a. Tun Ministry chhung hian chhungkaw nuai 1 sing 2 tuam zawh ngei kan inring a ni, a ti. Sawrkar hian ram hausakna infrastructure siam kawngah tha a thlah ngai lova, MNF hun laia compensation thu avanga Tuirial Hydel Project lo hlamchhiah tawh pawh tunah chuan thui tak kan thawk leh ta a. Meidum Gas Plant pawh ei a tling chho mek a, lung sakhat liantak an verh pawh hunah phei chuan helai hi Gas Map-a hmun pawimawh tak ala ni dawn a ni, Minister chuan a ti bawk a ni.

Dr. Saihlira, DVO, Kolasib chuan NLUP Bawng semna inkhawm hi a kaihruai a. Bawng chi tha zawnga Department lamin UP, Haryana leh Rajasthan thlenga an vah thu te, bawng chi tha man to tak Chief Minister hmalakna-a chawk luh alo ni ta chu bawng vulhtute tan chuan vanneihna sang tak a nih thute a sawi a ni.

Bawng chi tha/chi thar (New breed) hi bawng vulh thlangtu mi 1 hnenah pahnih (2) zelin pek an ni a. Bawngte hi an lian thain an hrisel hmel hlawm hle a ni. Bawng chi tha semna inkhawmah hian Pu Lalramnghaka, Director, SIRD leh sawrkar hotu dangte pawh an tel a ni.