Zo Ri-mawi International leh Disaster Management & Rehabilitation Department tangkawp te chuan vawiin khan Chanmari YMA Hall-ah chhiatrupna lo thleng thei laka mipuite him zawk theih nan Inter District College Debate Competition an buatsaih a. He hun hi Disaster Management & Rehabilitation Department enkawltu Minister Pu C. Ngunlianchunga chuan hmanpuiin Debate-a ti tha te hnenah lawmman a hlan a ni.

Pu C Ngunlianchunga chuan Mizoram tan hian hetiang ang debate neih hi thilpawimawh leh tul tak mai a ni a, kan hriat theuh ang in Mizoram hi India ram chhung a lirnghing na ber thlen theihna hmun Seismic Zone-5 (five) a awm kan ni a, kan in sak dan ten a zir tawhloh avangin lir lo nghing ta se vanduaina rapthlak zawk tuar thei reng dinhmun ah kan ding mek a ni, a ti.

Minister chuan kan thalai lehkha thiam college kal laite hian chhiatna lo thleng thulh a kan himna tur leh nep zawka kan tawrh theih dan tur ngaih pawimawh nachang in hriat a, hma in hruai chuan, kan ram mipui tam zawk hian kan lo harh chhuah phah in, kan lo him zawk nan mi tangkai tak in la ni ang tih ka ring a ni, a ti. Vawin a lo kal khawm te hian, vawin ni a kan zir leh kan hriat ang te hi, helai hmun a awm ve lo te hnen a hrilh chhawng zel tu ni thei tur in leh kan hriatna te midang te tan a tangkai zawk a hmang thei tur in duhsakna ka hlan in ka chah duh nghal che u a ni, a ti bawk.

Vanduaina rapthlak lian tham a lo thlen thulh a mipui ten kan tawrhna a lo nep zawk theih nan leh kan him tlan zawk theih nan Disaster Management and Rehabilitation hian nasa takin in hma a lak thu a sawi a. Vanduaina rapthlak a lo thlen thulha, zei tak leh felfai taka chhanchhuah na hna kan thawh theih nan MAP leh IR battalion hrang hrang 7 atangin State Disaster Response Force (SDRF) mi 662 a trained chhuak tawh a. Mizoram chhung a NGO hrang hrang te nen pawh thawh ho na tha tak nei in, mipui ah zirtir na vawi duailo kan pe tawh a ni, a ti bawk.

Vawiina Debate Competion neihah hian Aizawl, Champhai, Saiha, Mamit, Lunglei leh Kolasib District-a collge zirlai te an tel a. Debate thupui chu ‘ Chhiatrupna thleng thei laka invenna lamah Mizote kan in puahchah tha tawk’ tih a ni a. Opposition Bench chu thusawi tha zawk, Winner niin lawmman sumfai cheng 50,000 an dawng a, Movers Bench-in lawmman sumfai cheng 30,000 an dawng. Best Debator chu F. Lalnghakliana, Lunglei College niin a dawtu chu Zosiamkimi, Govt. Champhai College a ni a, Best Debator hian sumfai cheng 10,000 leh a dawttu hian sumfai cheng 5000 an dawng a ni.