Vawiin chawhnu khan Health Minister Pu Lal Thanzara hovin Chief Minister’s Conference Hall, Mc. Donald Hill, Zarkawt-ah ESI(Employees’ State Insurance Scheme) chungchang meeting neih a ni.
Kan tana la tha tur leh la tangkai tur chu a tir atangin uluk tak leh fimkhur taka lo thlir lawk a ngai a ni tiin meeting kaihruaitu Pu Lal Thanzara chuan ESI Scheme hi Ministry of Labour and Employment, Govt. of India hnuai ami, Autonomous Body pakhat ESI Corporation in a enkawl anih thu a sawi a. Mizoram, Manipur, Arunachal tih loh ah chuan ESI Scheme hi hman vek tawh anih thu a sawi bawk.
ESI hian ama pual ESI Act, 1948 a nei hranpa a, sorkar hnathawk lo organised sector a hnathawk (labourer) an thla khat hlawh Rs. 15,000/- aia hniamte tan Social Security a buatsaih sak a ni. He scheme hi state sorkar leh ESIC inbiakremna atanga duanchhuah tur a ni a. A hmasa berin state sorkar in phalna leh remtihna a pek a ngai a. Mizoram Cabinet chuan ni 21.5.2013 a an meeting-ah he scheme hi an lo remti tawh a, mi 10 aia tam chhawr (employed) te chu he ESI Act hnuaiah hian an awm nghal a. Contribution pawh an pe nghal tur a niin an hnuaia thawk zatte pawh dik takin an report thin tawh tur a ni. ESI Act hnuaia awm theite chu Dawr, Chanchinbu, Cinema/Theatre, Hotel leh Restaurant etc. bakah School, Hospital etc. sorkar atanga medical benefit claim ve theilo zawng zawng pawh cover thei tura ruahman a ni ang. He scheme hman tangkai theihna tur chu dam mawh hritlan, nau neih leh funeral expenses etc. ah te a ni ang.
Tun dinhmunah hian Aizawl Municipal area huam chhunga ESI Scheme implement na tura State sawrkar tih ve tur 2 (pahnih) Dispensary buatsaih leh staff lak chu zawh fel thawkhat a ni tawh a. Dispensary hi Urban Health Centre, ITI-ah siam a ni a ; equipment tlem la kim lo bak chu hman mai theih a ni tawh.
ESI Scheme zawm hi invenna tha tak a la ni ngei dawn a. ESI Scheme chungchang hi vawiin meeting ah hian Dr. C. Lalthanpara, OSD, MSHCS in power point presentation hmangin hrilhfiahna a nei a. Hemi thu sawiho tur hian damdawi in leh sikul hrang hrang aiawhte vawiin ah hian an kalkhawm a hmala zel turin kum thar lamah sawihona la neih leh tur a ni.
