Vawiin chawhma Dar 11:00 khan Pu Lalbiakthanga Khiangte, DIG Northern Range in Chhingchhip ah Police out Post thar a hawng.

Police Out Post thar hawnna inkhawm hi Chhingchhip Community Hall ah neih niin Pu PC Laltanpuia, MPS, Addl. SP Serchhip chuan a kaihhruai a. Pu Lalbiakthanga Khiangte, DIG (Northern Range) chuan Police Out Post thar chu Chhingchhip leh a chhehvel khawtlang tana hmasawnna thlentu ni tura a duh thu sawiin, mipuite tana thlamuanpui tlak an nih ngei theih nan thawktu tur te pawh inpuahchah turin a chah. Chutihlaiin, Police mi leh sate chu mize hrang hrang nei rawn awm an nih dawn avangin mipuiten lo dawngsawng thiam turin a chah bawk a, Serchhip SP leh staff te chu Police Out Post tha ber nei thei tura tan la turin a fuih baw a ni.

Pu Sathiyasundaram, IPS, SP Serchhip chuan vawiin hi Chhingchhip mipuite tan chuan ni chhinchhiah tlak a ni a, hun rei tak mipui ten an lo besei tawh thil a ni a a lawmawm a ni, a ti. Serchhip kal kher ngai tawh lovin mahni awmhmun atangin Chhingchhip khua leh khaw chhehvel ten FIR a thehluh theih tawh dawn a ni, a ti a. Mipuite chu a tul ang zela thawhpui turin a ngen a ni.

He hunah hian Pu R. Sanghmingthanga, President Sub Hqtrs. YMA Serchhip pawhin thu sawiin Chhingchhipa Police Out Post a awm ta chu Sub Hqtrs. YMA pawh an lawm thu a sawi a, Chhingchhip khua chu khaw vannei tak an ni, a ti a. School tha tak St. Peters Higher Secondary School leh Sainik School te a awm tawh hnuah Police Out Post a han awm leh ta chu Pathian malsawmna a ni, a ti.

Police Out Post atan hian hi VC Building chu a thlawna luah hawh rih a ni a, Out Post hmun tur hi tihfel tawh niin Pu Biakvela leh Pu Biakchhawna Chhingchhip khaw mi ve ve te chuan Chhingchhip Venghlun a an ram chu Police Out Post leh Staff Quarters sakna tur atan an pe tawh a ni.