Mizoram Assembly intlan buatsaihna thli thlai a lo kal Chief Election Commissioner Pu V.S. Sampath leh thuihruai Election Commissioner 2 Pu H. S. Brahma leh Dr. Zaidi te chuan vawiin chawhma khan New Secretariat Complex Conference Hall-ah Press Conference an nei a, tualchhung chanchibu mite an tel tha hle.
Chief Election Commissioner Pu V.S. Sampath chuan inthlanna tur state hrang hranga inbuatsaihna an thlithlai zawh hnuah a khaikhawmna ni pahfawma chanchinbu leh thuthar thehdarh tute hmaa Press Conference an neih thin chu Election Commission of India kalphung anih thu a sawi a. Mizoram chu inthlan chungchangah state dangte entawn tlak a nih thu te, inthlanna fel leh fai, ralmuang leh zalen neih theihna tura mipui mimir tawiawmnate chu fakawm a tih zia a sawi hmasa a. Mizoram an rawn tlawh tuma inthlan kaihhnawih mi pawimawh hrang hrang sorkar thuneitu lian ber ber leh invenna kawnga mawhphurtute thil awmdan an sawipui te chu khaikhawmin tha thawkhat hle a commission in a hmuh thu chanchinbu mite hi a hrilh a ni.
Mizoram mipui duh dan anga inthlanni leh vote chhiar ni sawn danglam anih tak thute sawiin a tam thei ang berin inthlanna ah an vote hlu tak an thlak theih ngei a beisei thu a sawi nghal bawk a ni.
Hmun dangah chuan political party hruaitute an kawm thin chu duh tawkin Mizoramah erawh chuan civil society te chu inthlan chungchanga thawh hlawk tak an nih thin avanga anmahni kawmna hun an buatsaih thu a sawilang bawk.
Bru raltlante chungchang bik tarlangin CEC chuan Tripura refugee camp a vote thlanna turah hian a dik leh felfai thei ang bera thil kalpui tum anih thu te, chumi atana Tripura CEO pawh hriattir anih thu leh Special Drive kalpui mek pawh uluk taka ennawn leh anih tur thu a sawi a, rinhlelh leh ngaihthat lohna tur awmlo thei ang bera ruahmanna chak taka buatsaih a ni a ti.
A vawikhat nan rampum huapa VVPAT hman tur pawh Mizoram bikah chuan Aizawl khawpui Assembly bial 10 ah hman tum a ni Pu Sampath chuan a ti. Candidate te tan an sum sen hmanral chungchangah workshop buatsaih anih tur thu leh phalna chi hrang hrang RO hnen atanga an lak tulte awlsam taka chhawpchhuah sak an nih dante a sawifiah bawk a ni.
Chief Election Commissioner leh a thuihruaite hian tualchhung thuthar thehdartute chu thawhpuiah sawmin mipui thlan sorkar-nasiamtura vote neitute mawhphurhna leh tih tur bakah mipui mimirin inthlan boruak thianghlim tak an neih theihna tura tanlak puiah an sawm a ni.
