Vawiin khan Environment & Forest Department Conference Hall, Tuikhuahtlang-ah ni 3 (6th - 8th November) chhung awh tur Environment & Forests Department leh Regional Centre, National Afforestation & Eco-development Board, MoEF, NEHU Shillong ten tangruala an buatsaih Ramhnuai atanga kan thil hmuh theih hrang hrang hman tangkai lehzual a nih theih nana a enkawltu bikte leh hetiang lam hmang tangkaituten inpawh zawka hma lakho theihna tur leh hman tangkai theih dan tur chungchang zirhona neih a ni. He hun hi Pu Rosiama Vanchhong, Additional Principal Chief Conservator of Forest in a hawng a, Pu Liandawla, CWLW in a kaihhruai a ni.

Hemi kaihhnawih thupui hrang hrangte hi Forests Department, MZU, NABARD, KVI Board, National Bamboo Mission (NBM), RCNAEB atanga mi thiamten an zirtir a ni. He hun hmang tur hian thingtlanga Joint Forest Management Committee (JFMC)-a Chairman leh Secretary te, Forest Development Agency te, sum leh paia tanpuina pe theitu hrang hrang te, tlawmngai pawl leh thingzai ni lo, ramngaw hnephnawl dang eizawn nana hmangtu hrang hrang te an tel a ni.

A ni 1 na leh ni 2 na ah thupui hrang hrang an zir ho ang a, ni 3-na (8th November, 2013) chawhma lamah hian Field Study neiin Value Addition Centre, Lengpui, Bamboosetum, Lengpui ; Medicinal Garden Nursery, Sairang leh Mizoram Venus Bamboo Sairang ten an tlawh ang. Chawhnu lamah Group Discussion neiin an thil hmuh leh zir chhuahte atanga hmalak dan tur rawtna an siam zawhah a kharna hun hman a ni ang a. Pu Rosiama Vanchhong, Addl. Principal Chief Conservator of Forests leh Pu Jitendra Kumar, Chief Conservator of Forest (Planning & Development) & Nodal Officer, National Afforestation programme, Mizoram ten thu an sawi bawk ang.