Vawiin khan Election Commission of India (ECI) hotulu pathum – Pu V. S. Sampath, Chief Election Commissioner; Pu H. S. Brahma, Election Commissioner leh Dr. Syed Nasim Ahmad Zaidi, Election Commissioner te chuan tun thla tawpa Mizoram Assembly inthlanna lo awm tura inpuachah dan leh inthlanna kaihnawih thil pawimawh te sawiho turin Aizawl an rawn thleng. Vawiin tlai vek khan ECI hotulu te hian political party hrang hrang leh tlawmngai pawl thenkhat aiawhte chu New Secretariat Complex, Conference Room-ah an kawm. Hemi hnu hian ECI hotulu te hian District pariat (8) a DC leh SP te chu inthlanna lo awm tur chungchangah meeting an neihpui nghal bawk a ni.

Naktuk zingah ECI hotulu te hian Chief Secretary, DGP leh CEO te chu inthlan chungchang sawipuiin meeting an nei dawn a, hemi hnu hian New Secretariat Complex, Conference Room-ah chanchinbu mite leh thuthar thehdarhtute an kawm zui nghal bawk ang. Natuk vek hian ECI hotulu te hian Delhi an pan ang.