2836/2023-2024

Aizawl, the 23rd November, 2023: Chief Electoral Officer (CEO) Pu Madhup Vyas, IAS chuan vawiin chawhnu dar 12:30 khan Mizoram chhung District 11 a District Election Officer (DEO) te chu General Election to Mizoram Legislative Assembly, 2023 atana vote chhiar chungchanga inpuahchahna an kalpui tawh dan leh hmachhawp an neihte video conference meeting kaltlangin a sawipui.

Meeting kaihruaitu CEO Mizoram Pu Madhup Vyas chuan vote chhiar tura inpuahchahna chak taka kalpui chhoh mek a nih thu sawiin, Election Commission of India ruahman angin November ni 27, 2023 (Thawhtanni) ah vote chhiar chhinna 'full dress rehearsal' Encore portal hmanga neih tum a nih thu a sawi a. District Election Officer-te chu harsatna awm lo tura hemi atana lo inruahman lawk vek tur leh chawhnu dar 3:00 ah report kimchang pek vek hman tum turin a chah a. Inthlan vuakveta thil chhinchhiah tlak leh dangdai, entawntlak tak ni a ngaih 'best practices & innovation' an neihte CEO Office-ah November ni 30, 2023 ral hma ngeia thehluh hman tum turin a chah a. An District chhung theuha inthlan duty Official hna thawk tha, chawimawi tlak ni a an hriatte chu CEO Office-ah ziaka thlen turin a chah bawk a. Vote chhiar hun Counting Day bik atan ECI in Counting Observer 40, AC tin tan 1 zel a rawn ruat thu a sawi a. DEO te chu RO's Handbook tha taka rawn thin turin a chah a, District Magistrate an nih angin Dan leh thupek kenkawh kawngah ruahmanna felfai taka siam turin a chah nghal bawk.

He hunah hian District Election Officer (DEO) 11 te hnen atangin vote chhiar hun atana inpuahchahna kalpui dan tlangpui leh hmabak la awmte ngaihthlak a ni a. Tun dinhmunah harsatna awm lova vote chhiar tura inpuahchahna tha taka kalpui mek zel a nih thu leh zawhfel thuai beisei a nih thu an tarlang a ni.

Vawiin meeting-ah hian EVM, Postal Ballot leh ETPBS/ ETPBMS hmanga vote tla chhiar dan tur chungchangte, Counting Hall luh leh chhuah dan tura ruahmanna siam leh a hungna siam chungchangte, daltu awm lova him taka Strong room atanga Counting Hall-a EVM thiar dan turte, vote chhiar nana dawhkan leh hmanraw mamawh dang ruahman dan chungchangte sawiho a ni a. Dan leh thupek kenkawh dan tur leh venhimna khauh taka kalpui dan tur chungchangte pawh sawiho a ni.

Heng bakah hian Media Centre mumal tak siam leh round tin result-te mipui hriat tura puanzar nghal zel dan turte tarlan a ni a. ECI duhdan anga boruak muanawm tak hnuaiah felfai taka vote chhiar a nih theih nana hmalak tulte, a hun taka vote chhiar tan bakah a hma thei ang bera zawhfel a nih theih nana Counting Supervisor, Counting Assistant, Micro Observer, Staff dang, hmanraw mamawh leh tul pawimawh dang ruahman a nih dante sawiho a ni a. Traning leh randomisation kalpui tawh dan leh hmabak awmte pawh ngaihthlak a ni bawk.

CEO hi Pu H.Lianzela, Addl. CEO-I, Pu Amol Srivastava, Addl. CEO-II, Pu James Lalnunmawia, Jt. CEO, Pu R.Vanrengpuia, Dy. CEO-I leh Pu Henry C.Lalrawnkima, Dy. CEO-II te'n an tawiawm a ni.