2835/2023-2024

Khawzawl, 23rd November 2023: Khawzawl District Administration hnuaia MLA bial awmchhun 22-Tuichang (ST) A/C ah vote chhiar tura inbuatsaihna kalpui chhunzawm zel a ni a. Vawiin khan a thawhkhatna atan vote chhiar tur Counting Official leh Observer aiawha vote chhiar lo enpuitu tur ‘Counting Micro Observer’ te tan DRDO Conference Hall leh BNRGSK Hall, Khawzawl Dinthar-ah te neih a ni.

Training hi State Level Master Trainer Pi V. Lalmuanpuii, Project Director DRDO leh Pu Lalthakima Chhangte, BDO Khawzawl ten an pe a. Trainingah hian vote chhiar ni a tihtur hrang hrang - EVM vote chhiar dan, Postal Ballot leh Electronically Transmitted Postal Ballot Paper (ETPBS) chhiar dan te inhrilhfiah a ni a. Training thawhhnihna hi December ni 2-ah neih leh tur a ni.

Vote tla te hi December ni 3 khian Counting Center - Khawzawl DC Conference Hall-ah chhiar tur a ruahman niin, counting table 14 a awm dawn a. Zing dar 08:00 atangin Postal Ballot chhiar a ni ang a, zing dar 08:30 atangin EVM a vote tla te chhiar tan a ni ang.