4836/2024-2025

Dated the 26th March, 2025 : Vawiin khan Pu Madhup Vyas, Chief Electoral Officer, Mizoram chuan Mizoram chhunga Political Party hrang hrang aiawhte meeting neihpuiin inthlan leh a kaihhnawiha thil tul hrang hrangte sawiho a ni.

Chief Election Commissioner of India chuan state hrang hranga Chief Electoral Officer(CEO), District Election Officer(DEO) leh Electoral Registration Officer(ERO) te chu anmahni thuneihna huam chhunga Political Party te meeting neihpuiin inthlan kaihhnawiha ERO, DEO leh CEO level a chinfel ngai leh rawtna an neihte sawipui turin a ti a.

He thupek bawhzui hian Political Party te chu ni 15.03.2025-18.03.2025 chhung khan Assembly Constituency hrang hrang 40 a Electoral Registration Officer level ah meeting neihpui tawh niin ni 19.03.2025 - 21.03.2025 chhung khan District 11 a District Election Officer te chuan meeting an lo neihpui tawh bawk. Vawiin ni 26.03.2025 (nilaini) khan a hmawrbawk nan Chief Electoral Officer chuan Political Party te chu meeting a neihpui ve leh a ni.

He meeting ah hian Chief Electoral Officer chuan inthlan hi Election Commission of India in dan hrang hrang a siam hmanga huaihawt thin a nih avangin Political Party te chu inthlanaa stakeholder pawimawh ber pawl an nih angin heng dan hriatna kawngah tan la thar turin a fuih a.

He Meeting ah hian Political Party aiawhte chuan rawtna an neih angte Chief Electoral Officer hnenah thlenin inpawh taka sawihona hun hman a ni.