1171/2023-2024

Champhai, the 18th July, 2023: MLA General Election 2023 neih tur inpuahchahna kalpui chhoh meka hmalaknate endikin Chief Electoral Officer, Mizoram Pu Madhup Vyas, IAS chuan vawiin khan zankhat riak turin Champhai a tlawh.

DRDO Conference Hall-a District Election Official-te a kawmnaah Pu Madhup Vyas chuan thu sawiin, Mizoramah inthlanna muanawm tak leh felfai tak neih a ni tawh thin a, hemi chhawmnung zel tur hian thahnemngai taka kan tanrual a pawimawh a ni, a ti a. Champhai chu District nuam leh mawi tak a nih thu sawiin, District Election Officer thahnemngai tak kaihhruaina hnuaiah election hmalaknate tha taka kalpui a ni chu lawmawm a tih thu a sawi a. District thar Khawzawl District chhunga Champhai North Assembly Constituency huamtel Polling Station-te pawh la kutkena ngaihven zel a ngaih thu a sawi bawk.

Kum 2018 MLA General Election-ah State puma vote tla chawhrual aiin Champhai District-a vote tla zat percentage a tlem thu leh tanlak a ngaih thu tarlangin, kumin MLA General Election-ah vote tla percentage a san theih nan SVEEP Plan mumal tak nei a, mipuite hnena vote thlak theuh tura sawmna siam mai bakah vote thlak tura mamawh leh tul dangte tam zawk chhawpchhuah a pawimawh thu a sawi a. Election Commission of India-in inkaihhruaina a siamte ngaipawimawha zirchiang tur leh ngaihven zel thin turin District Election Official-te a chah bawk.

District Election Officer (DEO) Pu James Lalrinchhana chuan hun chep tak kara Champhai rawn tlawha election hmalaknate rawn hmuhpuitu Chief Electoral Officer chungah lawmthu a sawi a. Champhai District hnuaia Assembly Constituency 3, 23-Champhai North, 24-Champhai South leh 25-East Tuipuiah January ni 13, 2023 a Final Electoral Roll tlangzarhah voter 56,362 an awm thu a sawi a. Polling station 84 a awm mek thu leh heng zinga 6, Champhai North AC amite Khawzawl District-ah an awm thu sawiin, Polling Station hmunhma thlak leh hming thlak tih loh a thar siam belh a awm loh thu a tarlang bawk.

Pu James Lalrinchhana chuan Electoral Roll thar buaipui kawnga hmalakna leh inthlanna muanawm leh felfai nei tura ruahmanna duante tarlangin, Sector Officer leh Sector Police Officer-te ruat fel an nih tawh thu a sawi a. Inthlan nana EVM khawl hman tur bakah training huna hman tur leh EVM chhia a awm thulha a thlakna tur Reserved EVM te endikna First Level Checking (FLC) neih fel a nih tawh thu sawiin, tun dinhmunah kumin inthlanpui atana hman tur EVM indaih zan Champhai District-in a kawl mek thu a sawi a. Polling Station tinte'n Danin a phutte an zawm tha em tih leh a him tha em tih tun thla chhunga enfiah vek hman tum a nih thu a sawi bawk.

Inkawmna hun hman zawh hian Chief Electoral Officer Pu Madhup Vyas chuan DC Office tlawhin EVM khawl dahna Strong Room, Vote chhiarna tur Counting Centre leh inthlanna kaihhnawiha mamawh tur hrang hranga ruahmanna kalpuite a enfiah a. Chawhnuah 23/24 Kahrawt -I atana Polling Station hman Govt. Primary School, 24/06 Venglai-l leh 24/07 Venglai-II atana Polling Station hman Govt. Comprehensive Middle School leh 24/09 Bethel-I atana Polling Station hman Govt. Primary School VI te tlawhin inthlan nana hman tur a nih angin danin a phut tui, power supply, ramp, inthiarna leh tul dang Assured Minimum Facilities (AMF) te a awm tha em tih a endik nghal a ni.