1170/2023-2024

2023 Vawkhniahzawn thla ni 18: Lai Autonomous District Council (LADC) leh Chakma Autonomous District Council (CADC) hnuaia Village Council (VC) 11-a hmun ruak hnawh khah nana by-election neih tura hman tur final electoral roll chu vawiin khan Lawngtlai Election Officer Pu Denny Lalchhuanawma chuan Lawngtlai DC Conference Hall-ah a tlangzarh a. Final electoral roll hi political party ai awhte hnenah a hlan nghal.

Pu Denny Lalchhuanawma chuan final electoral roll dik leh felfai tak a hun taka tihchhuah a nih theih nana a buaipuitu official-te leh village level officer-te chungah lawm thu a sawi a. VC by-election buatsaih theih hun tur chu la hriat loh mah se, inthlan buatsaih a nih hun hunah inthlan thianghlim, felfai leh muanawm tak buatsaih a nih theih nan political party hrang hrangte thawhpuina a ngen nghal bawk.

By-election hi LADC hnuaia VC 8-a general seat 10 leh reserved seat 2 hnawh khahna tur leh CADC hnuaia VC 3-a general seat 3 hnawh khahna tura ruahman a ni a. LADC huam chhungah 32-Nghalimlui, 47-Dumzautlang, 50-Kakichhuah, 59-Chamdurtlang-II, 67-Electric Veng Lawngtlai leh 68-Lawngtlai Bazar-ah te general seat 1 ṭheuh hnawh khah tur awmin, 65-Kawnkhua-ah general leh reserved seat 1 ve ve leh 87-Thaltlang-ah general seat 3 leh reserved seat 1 hnawh khah tur a awm a. CADC huam chhungah 20-Aratinagar, 30-Jarulsury-I leh 47-Vaseitlang-II-ah te general seat 1 ṭheuh hnawh khah tur a awm bawk.

Final electoral roll-a a lan danin, LADC hnuaiah Nghalimluiah voter mipa 371 leh hmeichhia 356, a zavaiin voter 727; Dumzautlangah voter mipa 86 leh hmeichhia 65, an zavaiin voter 151; Kakichhuahah voter mipa 67 leh hmeichhia 80, an zavaiin voter 147; Chamdurtlang-II-ah voter mipa 45 leh hmeichhia 43, an zavaiin voter 88; Kawnkhuaah voter mipa 67 leh hmeichhia 63, an zavaiin voter 130; Electric Veng Lawngtlaiah voter mipa 492 leh hmeichhia 520, an zavaiin voter 1,012; Lawngtlai Bazar-ah voter mipa 789 leh hmeichhia 967, an zavaiin voter 1,756; Thaltlangah voter mipa 208 leh hmeichhia 204, an zavaiin voter 412 te an awm a. CADC hnuaiah Aratinagar-ah voter mipa 116 leh hmeichhia 110, an zavaiin voter 226; Jarulsury-I-ah voter mipa 318 leh hmeichhia 323, an zavaiin voter 641; Vaseitlang-II-ah voter mipa 144 leh hmeichhia 132, an zavaiin voter 276 te an awm bawk.