1172/2023-2024

Khawzawl, 18th July 2023: Khawzawl District District AH & Vety Office chu vawiin khan AH & Vety Minister Er. Lalrinawma chuan a hawng a. Veterinary, Fishery & Sericulture Board Vice Chairman Pu C. Lalmuanpuia chuan khualzahawm niin he hun hi a hmanpui bawk.

Hawnna inkhawm Khawzawl Electric Veng Hall-a neihah khuallian Er. Lalrinawma chuan Khawzawl District AH & Veterinary Office-a hawng thei chu a lawm thu a sawi a. Mizoram sawrkarin District thar te hmasawnna a ngaihpawimawh thu sawiin sawrkar department hrang hrang te District tharah an inbun chhoh mek thu a tarlang a. A department chan zinga mi Excise & Narcotics pawh Khawzawl District-ah din tuma hmalak mek a ni, a ti.

AH & Vety Minister chuan hruaitu hmasate hmalakna zarah AH & Veterinary Department chu Department ngialnghet tak a ni, a ti a. India ramah Mizoram chu Veterinary Hospital dinna tura dan mumal tak zam hmasa ber leh ran vulhtute pui tura Mobile Veterinary Unit nei hmasa ber a nih thu bakah ASF vanga vawk suat sak te zangnadawmna pek a nih thu te a tarlang a. AH & Vety Department chuan ar, vawk leh bawng te chu chi tha leh thar rang zawnga an thlak thu leh ran natna za zela sawmsarih atanga sawmriat (70-80%) chu mihring kaichhawn chhoh theih a nih avangin ran hrisel ei a pawimawh thu a sawi a. Ran vulh senso chhawk zangkhai kawnga hmalakna pakhat atan Lengpuiah ran chaw siamna hmun ‘Sustainable Animal food Distribution System to check inflation of meat and its end product, Mizoram under Special Assistance to State for Capital Expenditure (SASCE) 2020 – 2021’ lungphum phum a nih tawh thu a tarlang a. Ranvulh enkawl kawngah thanharh zel a tul thu sawiin thilsiamte duat taka enkawl chu Bible zirtirna pawimawh tak a ni,a ti a. In mamawh tawn theuh kan nih angin ran te tha taka enkawl turin kalkhawmte chu a chah.

Khualzahawm Pu C. Lalmuanpuia chuan Khawzawlin hmasawnna rahbi pawimawh taka hmu chho chu lawmawm a tih thu a sawi a. Chief Minister leh Deputy Chief Minister ten District thar pathum te hmasawnna an ngaipawimawh tak zet a ni, a ti a. Mizoramin hun harsa tak tak – hripui leng, vawk hri, ramri buai leh thil dang tam tak a tawh karah pawh AH&Vety Department-in sa leh bawnghnute a intodelh tura hma a lakna chu fakawm a tih thu a sawi a. Sawrkar flagship programme SEDP hnuaiah pawh Vety Department hnuaia inziaklut an tam thu tarlang a. Kalkhawmte chu ran enkawlna leh District AH&Vety Office hnathawh tawiawm zel turin a fuih a ni.

He hunah hian Khawzawl Additional DC, DRDO Project Director ni bawk Pu Lalfakzuala pawhin thu sawiin tunhnaiah DRDO Office, Sericulture Office leh AH & Vety Office te hawn thar a ni chu lawmawm a tih thu a sawi a. D.C. Office pawh sak hna thawh mek a nih thu tarlangin kumin kumtawpa MLA Election neih huna hman tur VVPAT leh EVM te dah nan hman a ni tawh, a ti a. Khawzawl District chhunga khaw pahnih Tualte leh Chawngtlaiah te Pradhan Mantri Krishi Sinchayee Yojana hnuaiah sial, bawng leh kel vulh tum a nih thu sawiin, Rural Developemnt Department leh AH& Vety hnuaia hmalakna te chuan ran vulh kawnga Khawzawl district theihna (potential) a pho chhuah theih ngei a beisei thu a sawi bawk.

Hawnna inkhawm hi Dr. C. Lalrintluanga, Addl. Director, AH & Vety in kaihruaiin report Dr. R. Malsawma, Joint Director, AH & Vety Department in a pe a. Dr. Lalbiakzuala Sailo, DVO, Khawzawl in lawmthu sawina neiin hun hman hi tih tawp a ni.

Report a tarlan danin Khawzawl District Veterinary Office hi September ni 20, 2021 atangin mumal taka kalpui tan a ni a. Khawzawl District AH & Vety Office hnuaiah hian District Veterinary Hospital, Khawzawl leh Zawlnghak khuaa Mithun Farm bakah Biate, Khawhai, Kawlkulh leh Rabunga Veterinary Dispensary te an awm a. NABARD RIDF – XXVII hnuaiah Vawk kah rai changtlung zawka kalpui a nih theih nan Boar Semen Station Khawzawlah din tuma hmalak mek niin, building sak lai mek paruk a awm bawka. Chungte chu:

1. Construction of Veterinary Hospital, Khawzawl - Rs. 70.00 lakh
2. Construction of District Laboratory Building, Khawzawl - Rs. 50.00 lakh
3. Construction of Chief Veterinary Officers Quarters, Khawzawl - Rs. 65.00 lakh
4. Construction of Veterinary Officers Quarters, Khawzawl- Rs. 50.00 lakh
5. Construction of Vety Dispensary at Kawlkulh - Rs. 50.00 lakh
6. Construction of VFA Quarters at Kawlkulh - Rs. 27.50 lakh te an ni.