1173/2023-2024

Lunglei the 18th July, 2023: Vawiin chawhnu khan Pu Lawmawma Tochhawng Vice Chairman,High Powered Committee, Lunglei chuan HPC Conference Hall ah Zirlai ti tha te leh Lallianzuala Chhangte (AIFF Men's footballer of the year 2022-2023) te hnenah lawmpuina a hlan.

He hun Pu C.Vanlalmuana, Chief Planning Officer, HPC, Lunglei kaihhruaiah Pu Lawmawma Tochhawng MLA chuan tunhma in zirlai titha lawmpuina hlan tur kan nei manglo thin a, tun kum nga atang khan hlawhtlinna chang hmuh tur an tam zel hi lawmawm a ti a. Graduate thar te chu hlawhtlinna rahbi zawh tur kawng thui tak an la nei a ni tih hre reng a mi tangkai leh chhawrtlak zawk ni turin tun aia nasa a zirna lamah tan an lak a pawimawh thu sawiin an kal zelna turah ngaihtuahna fim tak hmang a Pathian rawn chungin thu tlukna siam ula, in tisual lovang tiin a chah bawk. Tun dinhmun hruai thlengtu nu leh pa leh unau te theihnghilh ngai lo turin a ngen bawk. Pu Lawmawma Tochawng chuan Mizo nula leh tlangval an ni tih inhrereng a, zir sang ringawt ni lova, zirthiam leh hman tlak, chhawr tlak ni bawk turin a fuih a ni. Ram hmasawnna KMMTP lo hlawhtling tur leh Indo-Bangla Border Trade a takin a lo chhuak thuai dawn a, chumi atan chuan kan ram leh hnam hian zir thiam hi kan mamawh telh telh dawn a ni a ti. Mi min chhuhsak theih loh thiamna a hlu takzet niin a sawi a, midangte tana tangkai thei a awm hi hlawhtlinna chi khat a ni tiin he ram hi Mizo fa ten kan luah zel theihna turin a luahtu tur mihring kan lo pun zel theih nan fa 4 tal hring turin a sawm a ni.

Lunglei District atanga zirlai titha under graduate top ten a lang te hi 31 niin Lunglei Govt. College atangin 9, Govt. J.Buana College atangin 2, HATIM atangin 8, PUC atangin 9, Govt. Hrangbana College atangin 2 leh Faith College atangin 1 bakah JEE Entrance test a inziak tling tribal zinga pakhatna Lalmuanawmi D/o R.Lallianpuii, Serkawn leh Lallianzuala Chhangte Zohnuai, Lunglei (AIFF Men's footballer of the year 2022-2023) te hnenah lawmpuina thuziak leh pawisa fai pek an ni.

Lunglei DC Pi Ramdinliani IAS leh Pu Lalrotluanga member HPC ten fuihna thu an sawi.