Vawiin hian Lawngtlai DC Conference Hall ah NLUP Chief Media Officer Pu David L Thangliana, MIS telpuina in Lawngtlai District NLUP Line Department Officer ten Meeting an nei a, Lawngtlai District chhunga NLUP kalpui dan leh NLUP dawngtute hnathawh dante an sawi ho.

Chief Media Officer Pu David L Thangliana chuan thu sawiin, TV leh chanchinbute atangin Lawngtlai District in NLUP a kalpui dan te an lo chhiar thin a, hmasawnna duhawm tak tak kan hmuh thin avangin rilru a tihlim thin hle a ni. Khawvelin Media thiltihtheihna a hmang tangkai tial tiala, a hmang thiam te tan chuan chakna thahrui pawimawh ber te zing a mi a ni ta, chuvang chuan Lawngtlai District pawhin chu chu hriain tangkai zawka Media Officer hmang chho zel turin ka ngen che u a ni a ti. NLUP ah chauh nilovin, Department zawng zawngte huap vekin District-ah Media Committee din turin sawrkar in ruahmanna a kalpui mek a ni a ti bawk.

Meeting kaihruaitu Bawrhsap Pu J. Hmingthanmawia chuan Lawngtlai District NLUP dinhmun tlangpui a tarlanga tun dinhmunah NLUP dawng tura thlan zawng zawng hi chhungkaw 13276 an awm mek a, chung mite enkawl tur chian Line Department 8 an awm bawk a, Monitoring tha taka kalpui a nih avangin hmasawnna hmel duhawm tak tak kan hmu chho zel a ni a ti.

Line Department te pawh in a tir atanga NLUP an kalpui dan tlangpui leh tuna an dinhmunte an sawi hlawm a, Monitoring mumal taka kalpui a nih avanga hmasawnna tam zawk an hmuh mek thu an tar lang hlawm a ni.

Chief Media Officer hian naktuk nilengin Lawngtlai khawpui chhunga NLUP ti tha zual chhungkua te a tlawh kual dawn a, naktuk tukleh Dt 29.5.2015 hian Saiha District tlawhin a han kal leh dawn a ni.