Aizawl tlak lama awm veng pariat : Luangmual, Zonuam, Chawlhhmun, Tuivamit, Tanhril Vengthar, Central Jail Veng, Sakawrtuichhun Joint YMA, MZU Road Joint YMA Committee hruaitute chuan vawiin khan Pu Zodintluanga, UD & PA Minister chu a office chamber ah hmu in Vaivakawn leh Mizoram University kawng siam hna la zawh loh km. 1.8 vel la awm chu thawh chhunzawm a nih theihna tura an thu thlen ah Pu Zodintluanga chuan Joint YMA Committee hruaitute chu khawtlang tana an hmalakna fakawm a tih thu a lo sawi bakah Pu Lal Thanhawla, Chief Minister in kawng siam hmabak la awmte chu karleh chhunga hna thawk tan tura PWD hotute leh Contractor te a lo hriattir tawh thu a lo hrilh a, Central sorkar lam atanga sum lo kal tur a lo la thlen loh avanga hna chawlhsan lailawk tawh, sum awm lo chunga Chief Minister in an ngenna ngai pawimawh a kawng siam hna thawk chhunzawm leh tur a ni hi MZU Road Joint YMA Committee chuan lawmawm an ti hle a.

Mizoram sorkar chuan UD & PA Department kaltlangin JNNURM Programme hnuaiah hmasawnna ruhrel hrang hrang a din zingah Vaivakawn to Mizoram University kawng siam hna a telh a. He hna hi 85 % zawh fel a nih tawh laiin 1.8 Kms. vel chu hmabak a la awm a. He kawng siam hmabak hi zawh fel rih loh a nih avang hian Aizawl tlak lawma awm veng pariat te hian harsatna neuh neuh an neih phah avangin MZU Road Joint YMA Committee chuan lawmawm an ti hle a ni.